ჰარი პოტერის მე-20 იუბილე: ჰოგვორტსში დაბრუნება — ასე ჰქვია ჰარი პოტერის პირველი ფილმის 20 წლის იუბილესადმი მიძღვნილ სპეციალურ ეპიზოდს, რომელიც ლეგენდარულ ტრიოს — დენიელ რედკლიფს, რუპერტ გრინტსა და ემა უოტსონს — ასევე ფილმებში მონაწილე სხვა მსახიობებს გააერთიანებს.

სპეციალური ეპიზოდი ჯერ კიდევ ნოემბერში დაანონსდა, ახლა კი HBO-მ პირველი კადრები გაგვიზიარა, სადაც ვხედავთ, თუ როგორ იღებენ წერილებს ჰოგვარტსიდან ჩვენი საყვარელი გმირების როლების შემსრულებლები. ახალ თიზერში რობი კოლტრეინს (ჰაგრიდი), მეთიუ ლუისს (ნევილ ლონგბოტომი) და მარკ უილიამსს (არტურ უისლი) ვხვდებით.

თიზერის დასაწყისში გაზეთს ამოფარებული ადამიანი შესაძლოა ივანა ლინჩს (ლუნა ლავგუდი) მიამსგავსოთ. თიზერის ბოლოს მატარებლის სადგურზე კი, სავარაუდოდ, ემა უოტსონი მიაბიჯებს.

გადაცემის პრემიერა ახალ წელს, 2022 წლის პირველ იანვარს HBO Max-ზე შედგება. მასში "ახალი, საინტერესო ინტერვიუებითა და მსახიობებთან საუბრებით ფილმების შექმნის ჯადოსნურ ისტორიას" მოჰყვებიან.

ჰოგვორტსში დაბრუნებაში ასევე გამოჩნდებიან ჰელენა ბონემ კარტერი (ბელატრის ლესტრეინჯი), რეიფ ფაინზი (ვოლდემორი), ჯეისონ აიზეკსი (ლუციუს მალფოი), გარი ოლდმანი (სირიუს ბლექი), იმელდა სტონტონი (დოლორეს ამბრიჯი), ტომ ფელტონი (დრაკო მალფოი), გარი ოლდმენი (სირიუს ბლექი), ჯეიმზ და ოლივერ ფელპსები (ფრედ და ჯორჯ უისლები), ბონი რაიტი (ჯინი უისლი) და სხვები. აღსანიშნავია, რომ გადაცემაში ჰარი პოტერის წიგნების ავტორი ჯოან როულინგი არ მიუწვევიათ.

"ეს გადაცემა ეძღვნება ყველას, ვისი ცხოვრებაც ამ კულტურულმა ფენომენმა შეცვალა, — აცხადებს Warner Bros. Global Kids-ის პრეზიდენტი, ტომ ეშაიმი, — "დაწყებული მსახიობებითა და მომუშავე პერსონალით, რომელიც საქმეში სულსა და გულს დებდა, დამთავრებული ფანებით, რომლებიც ჯადოსნურ სამყაროს 20 წლის შემდეგაც კი აცოცხლებენ".

ნახეთ ჩვენი ყველა მასალა ჰარი პოტერზე.