გასულ კვირას იტალიელმა ეპისკოპოსმა სკოლის მოსწავლეებს გამაოგნებელი სიახლე "ახარა": მან ბავშვებს უთხრა, რომ სანტა კლაუსი არ არსებობს და უფრო მეტიც — სანტას წითელი კოსტიუმი კოკა-კოლამ რეკლამისთვის შეურჩია.

"არა, სანტა კლაუსი არ არსებობს. მეტსაც გეტყვით: სანტას წითელი კოსტიუმი კოკა-კოლამ ექსკლუზიურად სარეკლამო მიზნებისთვის შეარჩია", — განაცხადა ეპისკოპოსმა.

ადგილობრივი მედიის მიხედვით, ეპისკოპოსმა განცხადება წმინდა ნიკოლოზისადმი მიძღვნილ ღონისძიებაზე გააკეთა. აღსანიშნავია, რომ სანტა კლაუსის შთაგონების წყაროდ სწორედ წმინდა ნიკოლოზი ითვლება.

მას შემდეგ, რაც ეპისკოპოსის განცხადებამ ინტერნეტსივრცეში საყოველთაო უკმაყოფილება გამოიწვია, ქალაქ ნოტოს ეპარქიამ მისი სახელით ბოდიში მოიხადა.

"უპირველესო ყოვლისა, ეპისკოპოსის სახელით უდიდეს მწუხარებას გამოვთქვამთ იმ განცხადების გამო, რომელმაც ბავშვებს იმედი გაუცრუა. გვინდა, საკითხს ნათელი მოვფინოთ და ვთქვათ, რომ ეს ეპისკოპოსის მიზანი არ ყოფილა", — ვკითხულობთ განცხადებაში.

ნოტოს ეპარქიის მიხედვით, ეპისკოპოსს უბრალოდ სურდა, ბავშვებისთვის შობის ნამდვილი არსისა და ტრადიციების შესახებ მოეყოლა, რადგან ამჟამად დღესასწაული "კომერციული" და "არაქრისტიანულია".

"ბავშვებისთვის არ მითქვამს, რომ სანტა კლაუსი არ არსებობს. უბრალოდ იმაზე ვისაუბრეთ, რომ სინამდვილისა და სიცრუის ერთმანეთისგან გარჩევა მნიშვნელოვანია", — განაცხადა ეპისკოპოსმა ადგილობრივ მედიასთან ინტერვიუში.