ამერიკის შეერთებული შტატების ელჩი საქართველოში, კელი დეგნანი კახა კალაძის განცხადებასთან დაკავშირებით ამბობს, ერიკა ოლსენი საქართველოში ყოფნის დროს კახა კალაძეს ვერ შეხვდა, თუმცა იმედოვნებს მათი შეხვედრის შანსი მომავალში იქნება.

"მე ვიცი, რომ მერმა კალაძემ განმარტა მისი სიტყვები, თუმცა მე დავამატებ, რომ როდესაც სახელმწიფო მდივნის მრჩევლის მოადგილე იმყოფებოდა საქართველოში კავკასიის ტურზე, მას ჰქონდა შესაძლებლობა შეხვედროდა პრემიერმინისტრს, საგარეო საქმეთა მინისტრს, პოლიტიკურ პარტიებსა და სამოქალაქო საზოგადოებას, თუმცა სამწუხაროდ, ვერ შეხვდა ქალაქის მერს. იმედი მაქვს, მომდევნო ჩამოსვლაზე ის მოახერხებს, ისინი შეძლებენ შეხვედრას და განიხილავენ სხვადასხვა მნიშვნელოვან საკითხებს. მოგეხსენებათ, საელჩოს აქვს კარგი თანამშრომლობა თბილისის მერიასთან, გვაქვს საინტერესო პროექტები და იმედია, მომავალში ამ შეხვედრის შანსი იქნება", — განაცხადა ელჩმა.

"თანაშემწის მოადგილე რა უბედურებაა?" — ასე უპასუხამ კალაძე ოლსონის კრიტიკული განცხადების შესახებ დასმულ კითხვას. მას შემდეგ, რაც განუმარტეს, რომ ოლსონი სახელმწიფო დეპარტამენტის მაღალჩინოსანია, კალაძემ განაცხადა:

"თანაშემწე და იმის მოადგილე კიდე? არ ვიცოდი ეგეთი თანამდებობა თუ იყო".

კალაძის განცხადებას გამოეხმაურა იან კელი, რომელმაც ტვიტერის ოფიციალურ გვერდზე დაწერა:

"საგარეო პოლიტიკის კეთება შეურაცხყოფით. ვფიქრობ, თვით კისინჯერიც კი ვერ მოიფიქრებდა ამას".

აღსანიშნავია, რომ ბოლო პერიოდში ქართული ოცნების ლიდერები არაერთი განცხადება გააკეთეს, სადაც ღიად აკრიტიკებენ, მათ შორის შეურაცხმყოფელ კონტექსტში მოიხსენიებენ ქვეყნის საერთაშორისო პარტნიორებს. ხელისუფლების წევრები ხშირად ამბობენ, რომ არავითარი მნიშვნელობა არ აქვს რას ამბობს "ვიღაც ევროპარლამენტარი ბრძნული სახით". მმართველი პარტიის ლიდერები იმ საერთაშორისო პარტნიორებს, რომლებიც ქართულ ოცნებას აკრიტიკებენ, ნაციონალური მოძრაობის მეგობართა კლუბის წევრებს უწოდებენ და ამტკიცებენ, რომ ისინი კრიტიკული შეფასებების სანაცვლოდ "ფულს იღებენ".

აღსანიშნავია, რომ დასავლელი პარტნიორებისგან ხმაურიანი განცხადებები გამოიწვია თავად კალაძის მიმართვამ ესტონეთის პრეზიდენტის, კერსტი კალიულაიდისადმი. უკრაინული გამოცემისთვის მიცემულ ინტერვიუში კალიულაიდმა თქვა, რომ უკრაინა, მოლდოვა და საქართველო ევროკავშირის წევრობისთვის ჯერ მზად არ არიან, რის საპასუხოდაც კალაძემ განაცხადა რომ ყველამ თავის ქვეყანას უნდა მიხედოს. კითხვას, აფუჭებს თუ არა ასეთი განცხადებები ესტონეთთან ურთიერთობებს, ასე უპასუხა:

"ჰკითხეთ ესტონეთის პრეზიდენტს, აფუჭებს თუ არა. აუცილებლად დაუსვით ეს შეკითხვა ესტონეთის პრეზიდენტს".