ქართული ოცნების დეპუტატის, გია ვოლსკის განცხადებით, "ტყუილად არაფერი არ ხდება" და არის შესაძლებლობაც, რომ ჯანდაცვის მინისტრის, ეკატერინე ტიკარაძის გადადგომა მთავრობის ნაწილის პოზიციების შეუთანხმლებლობასაც უკავშირდებოდეს.

"შეიძლება, ეს უკავშირდებოდეს რაღაც შეუთავსებლობა-შეუთანხმებლობას გარკვეული პოზიციების, რომელიც გააჩნია მთავრობას, მთავრობის გარკვეულ ნაწილს, მეორე ნაწილს, შესაძლოა. რასაკვირველია, ტყუილად არაფერი არ ხდება, გეთანხმებით.

არაფერი ისეთი არ ხდება, მინისტრები იცვლებიან, მთავრობები იცვლებიან, ნებისმიერი ჩვენგანი, შეიძლება, ნებისმიერ დროს შეიცვალოს. კანდიდატურასთან დაკავშირებით, რასაკვირველია, როგორ შეიძლება, ისე ცარიელი იყოს და არავინა არაფერზე არ ფიქრობდეს. რასაკვირველია, დარწმუნებული ვარ, რომ მთავრობის შემადგენლობაში ამ თემაზე არის ლაპარაკი", — აღნიშნა მან.

პრემიერმინისტრ ირაკლი ღარიბაშვილის გადადგომაზე რამდენჯერმე გავრცელებულ ინფორმაციაზე კი ვოლსკი ამბობს, რომ ეს იმ რეალობის საპასუხოა, რაც ნაციონალური მოძრაობის სისტემაში შეიქმნა.

"პრემიერის გადადგომაზეც მუდმივად არის ლაპარაკი, რომ "აი, დღეს გადადგება, ხვალ გადადგება". ესეც, რასაკვირველია, მე მგონია, რომ არის საპასუხო იმ რეალობისა, რაც ნაცმოძრაობის სისტემაში შექმნა", — თქვა დეპუტატმა.

ეკატერინე ტიკარაძემ ჯანდაცვის მინისტრის თანამდებობა 9 დეკემბერს დატოვა. ტიკარაძემ თავისი სამწლიანი მოღვაწეობა შეაფასა, ყველას მადლობა გადაუხადა და განაცხადა, რომ კონსულტაციების შემდეგ საქმიანობის პარტიის პოლიტსაბჭოში გაგრძელება მიიჩნია სწორად. მინისტრს სიტყვა გადადგომა არ უხსენებია, არც ჟურნალისტების კითხვებს უპასუხა, ამიტომ მისი გადადგომის დაზუსტება უწყების პრესამსახურში გახდა საჭირო.

მანამდე მედიაში აქტიურად ვრცელდებოდა ინფორმაცია პრემიერმინისტრ ირაკლი ღარიბაშვილსა და ეკატერინე ტიკარაძეს შორის არსებულ დაპირისპირებაზე. გავრცელებული ინფორმაციის თანახმად, დაპირისპირება იყო ბოლო საკოორდინაციო სხდომაზეც, თუმცა მოგვიანებით, ეს დაავადებათა კონტროლის ეროვნული ცენტრის დირექტორმა, ამირან გამყრელიძემ უარყო.

აღსანიშნავია, რომ ტიკარაძე მწვანე პასპორტის უვადობას არ ემხრობოდა. როგორც მან 4 დეკემბერს განაცხადა, მიუხედავად იმისა, ჯანდაცვის სამინისტრო და დაავადებთა კონტროლის ცენტრი მთავარი უწყებები არიან ამ რეკომენდაციების გაცემის მხრივ, ვერ იტყვის, რომ "სრულად იზიარებენ ამ გადაწყვეტილებას". კოვიდგადატანილებისთვის მუდმივი პასპორტი პრემიერმინისტრის რეკომენდაცია იყო. 8 ნოემბერს ღარიბაშვილმა აღნიშნა, რომ არსებობდა მოსაზრება 6-თვიან ვადაზე, თუმცა საბოლოოდ საბჭომ უვადობაზე მიდი წინადადება გაიზიარა.