რუსეთის პრეზიდენტის ვლადიმერ პუტინის განცხადებით, უკრაინის სამხრეთ-აღმოსავლეთში არსებული უკრაინაში ვითარება გენოციდს ახსენებს. ამით პუტინი ერთ-ერთი რუსული საინფორმაციო სააგენტოს აღმასრულებელი დირექტორის, კირილ ვიშინსკის თხოვნას გამოეხმაურა, რომელიც მას კანონმდებლობაში ისეთი ცნებების შეტანას სთხოვდა, როგორიცაა გენოციდი და გენოციდისკენ მოწოდება.

"უნდა ვთქვა რუსოფობიაზე, როგორც პირველ ნაბიჯზე გენოციდისკენ. ჩვენ კარგად ვხედავთ და ვიცით ის, რაც ახლა დონბასში ხდება და ეს, რა თქმა უნდა, ძალიან მოგვაგონებს თქვენ მიერ ნახსენებ გენოციდს. აქ ფრთხილი ქმედებაა საჭირო, რათა ეს ცნება არ გაუფასურდეს და რეალური მოვლენები აისახოს. მოდი დავფიქრდეთ", — განაცხადა პუტინმა.

გასულ თვეს ამერიკული დაზვერვის წარმომადგენლებმა მოკავშირეები გააფრთხილეს, რომ ცოტა დრო დარჩა, რათა რუსეთს უკრაინაში სამხედრო მოქმედებების განხორციელებაში ხელი შეუშალონ. აშშ-მ ევროპულ ქვეყნებს მოუწოდა შეერთებულ შტატებთან იმუშაონ, რათა მოსკოვის შეკავების მიზნით ეკონომიკური და სამხედრო ზომების პაკეტი შეიმუშაონ.

უკრაინის თავდაცვის სამინისტრომ ნოემბრის დასაწყისში განაცხადა, რომ მის საზღვართან დაახლოებით, 90 000 რუსი ჯარისკაცი გადაისროლეს. გაურკვეველი იყო, რამდენი მათგანი იყო ადგილზე ახლად განლაგებული.