ჩინეთმა ქვეყნები, რომლებმაც პეკინის ზამთრის ოლიმპიური თამაშების დიპლომატიური ბოიკოტი გამოაცხადეს, გააფრთხილა, რომ "თავიანთი შეცდომის ფასს გადაიხდიან". ინფორმაციას ამის შესახებ BBC ავრცელებს.

ჩინეთის საგარეო საქმეთა სამინისტროს სპიკერი ვანგ ვენბინი აცხადებს, რომ აშშ-მ, ბრიტანეთმა და ავსტრალიამ ოლიმპიადის პლატფორმა პოლიტიკური მანიპულაციისთვის გამოიყენეს.

"მე ვერ ვხედავ შეშფოთების აუცილებლობას. პირიქით, პეკინის ზამთრის ოლიმპიადისადმი მხარდაჭერა მსოფლიოს უმეტესმა ქვეყანამ გამოხატა", — განაცხადა ვანგ ვენბინმა.

კანადა და დიდი ბრიტანეთი 2022 წლის პეკინის ზამთრის ოლიმპიადის დიპლომატიურ ბოიკოტს შეუერთდნენ. ოთხშაბათს, 8 დეკემბერს, ბრიტანეთის პრემიერმინისტრმა, ბორის ჯონსონმა განაცხადა, რომ ჩინეთში ადამიანის უფლებების დარღვევის გამო ოლიმპიადას არცერთი მინისტრი არ დაესწრება. ადამიანის უფლებების დარღვევა დაასახელა ბოიკოტის მიზეზად კანადამაც — ბრალდებებს პეკინი უარყოფს.

მანამდე, მას ბოიკოტი გამოუცხადა აშშ-მ და ავსტრალიამ. მედია წერს, რომ ბოიკოტს სხვა ქვეყნებიც განიხილავენ, მათ შორის იაპონია. რაც შეეხება, ახალ ზელანდიას, გამოცემის ცნობით, მათაც უარი თქვეს ზამთრის ოლიმპიადაზე დასწრებაზე, თუმცა ძირითად მიზეზად კორონავირუსის პანდემია დაასახელეს.