ქართული ოცნების საზოგადოებასთან ურთიერთობის მდივანი, შალვა პაპუაშვილი აცხადებს, რომ ოპოზიციას ქართულ ოცნებასთან შესარიგებელი არაფერი არ აქვთ და ისინი ქართველ ხალხს უნდა შეურიგდნენ.

"მუქარანარევი შერიგების თხოვნა უკვე თავისთავად აჩვენებს ფარისევლობას ამ იდეისა, მეორე — ქართულ ოცნებასთან მათ არაფერი შესარიგებელი არ აქვთ. ისინი უნდა შეურიგდნენ საქართველოს მოსახლეობას და ქართველ ხალხს. ჩვენ ვხედავთ ადამიანს, რომელსაც არ უნდა, უბრალოდ, რომ პასუხი აგოს საკუთარი ქმედებებისთვის, ეს არის საბოლოო ჯამში პასუხი ამ კითხვაზე და ეძებს ყველანაირ გზას, თუ როგორ დაიძვრინოს თავი პასუხისმგებლობისგან", — აცხადებს პაპუაშვილი.

6 დეკემბერს მიხეილ სააკაშვილმა განაცხადა, რომ ბრძოლა გამძაფრდება და არ გაჩერდება ქართული ოცნების დამარცხებამდე. ალტერნატივად სააკაშვილი მმართველ პარტიას "გონს მოსვლას" და ეროვნულ შერიგებას სთავაზობს. მისი თქმით, "ეს ყველასთვის საუკეთესო გამოსავალია".