საქართველოს პარლამენტმა თამბაქოს შესახებ კანონის ცვლილებების პაკეტი პირველი მოსმენით მიიღო. კანონპროექტი ერთდროულად რამდენიმე კანონში ცვლილებების შეტანას გულისხმობს.

ამ კანონპროექტის მიხედვით, თამბაქოს მოწევა აიკრძალება:

  1. ნებისმიერი დანიშნულების შენობა ნაგებობაში, გარდა კერძო საცხოვრებელი სახლებისა და აგრეთვე პატიმრობის და თავისუფლების აღკვეთის დაწესებულებებისა;
  2. საზოგადოებრივ ტრანსპორტში, მათ შორის, გემზე, კატერებსა და სხვა სანაოსნო საშუალებებზე;
  3. ნებისმიერი სასწავლო დაწესებულების და 18 წლამდე პირებისთვის განკუთვნილი დაწესებულებების შენობა-ნაგებობებში და ტერიტორიაზე;
  4. სამედიცინო და ფარმაცევტულ დაწესებულებათა შენობა-ნაგებობებში და ტერიტორიაზე, გარდა სტაციონარული ფსიქიატრიული და პალიატიური მკურნალობისთვის განკუთვნილი დაწესებულებების ან მძიმე ავადმყოფი პაციენტისათვის განსაზღვრული ადგილისა;
  5. იმ დაწესებულებათა შენობა-ნაგებობებში და ტერიტორიაზე, სადაც ინახება ცეცხლსაშიში ნივთიერებები;
  6. სტადიონებზე.

კანონპროექტის მიხედვით, ცვლილებების ამოქმედება ეტაპობრივადაა გათვალისიწნებული.