საუდის არაბეთის მთავრობამ აქლემების ყოველწლიური სილამაზის კონკურსიდან 40-ზე მეტი მონაწილე ბოტოქსის გამოყენების გამო მოხსნა. აქლემების სილამაზის კონკურსი საუდის არაბეთის ერთ-ერთი პოპულარული ფესტივალია, რომლის გამარჯვებულსაც დაახლოებით 66 მლნ დოლარით აჯილდოებენ.

აქლემების მეპატრონეები ხშირად იყენებენ ბოტოქსის ინიექციებსა და სხვა კოსმეტიკურ საშუალებებს, რათა აქლემი უფრო მიმზიდველად გამოიყურებოდეს, თუმცა ეს კონკურსის წესების მიხედვით სასტიკად აკრძალულია. ჟიურის წევრები აქლემს თავის, კისრის, კუზის, ბეწვისა და სხეულის მდგომარეობის მიხედვით აფასებენ.

ფესტივალი ერთი თვის განმავლობაში გრძელდება და ჟიური აქლემებს ამ პერიოდში მუდმივად ამოწმებს. ამ წელს ათობით სელექციონერმა აქლემების კუნთების გასაძლიერებლად ჰორმონები გამოიყენა, ხოლო ტუჩებისა და თავის ზომის გასაზრდელად ცხოველებს ბოტოქსი გაუკეთეს. ასეთი აქლემები კონკურსიდან მოიხსნა, ხოლო მათი მეპატრონეები დაჯარიმდნენ.

აქლემების სილამაზის კონკურსზე ცხოველებს ყიდიან და ერთმანეთს აჯიბრებენ კიდეც. ასე ქვეყანა ცდილობს ბედუინთა ტრადიციებსა და მემკვიდრეობას გაუსვას ხაზი, თუმცა აქლემები მრავალმილიონიან ინდუსტრიასაც ქმნიან და ასეთი ღონისძიებები რეგიონში ხშირად ტარდება.