ნაციონალური მოძრაობის თავმჯდომარის, ნიკა მელიას განცხადებით, მისთვის მისაღებია, რომ საკრებულოს თავმჯდომარეებად გიორგი გახარიას პარტიის წარმომადგენლებს დაუჭირონ მხარი.

"მე ვფიქრობ, გახარიას პარტიასთან არაფერი გვაქვს საერთო და არაფერ არც გვექნება, მაგრამ მოსახლეობა ასე გადაწყვიტა, რომ ამ მუნიციპალიტეტებში და არამხოლოდ ამ მუნიციპალიტეტებში, უმრავლესობა მანდატების მიანიჭა ოპოზიციას იმისათვის, რომ ქართულმა ოცნებამ ფული აღარ მოიპაროს, კორუფციული სქემები აღარ ხლართოს. ეს არის დაკვეთა, ამიტომ მე ვფიქრობ, რომ პრაგმატულია, ჩვენთვის მისაღებია, რომ ისინი იყვნენ საკრებულოს თავმჯდომარეები.

ჩვენ მათ დავუჭერთ მხარს საკრებულოს თავმჯდომარეობის კანდიდატებად, მაგრამ მნიშვნელოვანია, გვესმოდეს ძალიან კარგად, საკრებულო, როგორც ასეთი, თავისი შემადგენლობით, ვგულისხმობ პოზიციებს, იყოს დაკავებული ოპოზიციური პარტიების კანდიდატების მიერ", — განაცხადა მელიამ.

მისივე თქმით, ყველა საკვანძო პოზიცია საკრებულოებში უნდა ეკავოს ოპოზიციონერს რამდენიმე მუნიციპალიტეტში, რადგან ასე ჩათვალა საჭიროდ მოსახლეობამ.