ექსპრეზიდენტ მიხეილ სააკაშვილის ადვოკატის, დიმიტრი საძაგლიშვილის განცხადებით, პენიტენციურმა სამსახურმა მესამე პრეზიდენტის მიმართ შეზღუდვები გააუქმა, შესაბამისად, მან პროტესტი შეწყვიტა და აგრძელებს მკურნალობას. ადვოკატის თქმით, სააკაშვილს ტელევიზორით სარგებლობა უკვე შეუძლია.

"პენიტენციურმა სამსახურმა უკან დაიხია, მხოლოდ მას შემდეგ, რაც მიხეილ სააკაშვილმა დააფიქსირა ძალიან მძაფრი პროტესტი. რეალურად, პროტესტის ეს ფორმა გაჟღერებული იყო მხოლოდ იმის გამო, რომ მისთვის შეზღუდვები ამოქმედდა, მას შემდეგ, რაც ეს შეზღუდვები ფაქტობრივად გაუქმდა და უკან დაიხია პენიტენციურმა სამსახურმა, ბუნებრივია, რომ ეს პროტესტის ფორმა არის ამოწურული", — განაცხადა საძაგლიშვილმა.

გუშინ, 7 დეკემბერს, მიხეილ სააკაშვილმა განაცხადა, რომ მის წინააღმდეგ "შურისძიება განახორციელეს", ე.წ. დისციპლინარური ზომები დაუწესეს და შეხვედრები შეუზღუდეს. მან შეზღუდვების გაუქმებამდე ყველანაირ სამედიცინო მკურნალობაზე უარი თქვა.

ამის შემდეგ სპეციალურმა პენიტენციურმა სამსახურმა სააკაშვილის განცხადებას სიცრუე უწოდა. მათი თქმით, ექსპრეზიდენტის მიმართ გამოყენებული რაიმე სახის დისციპლინური ღონისძიება არ ყოფილა და მისი განცხადება საზოგადოებაში უწყების იმიჯის შელახვას ემსახურება.