ბათუმის საკრებულოს უფლებამოსილების ცნობის შემდეგ ოპოზიციამ სხდომა დატოვა. ქართული ოცნების დეპუტატების რაოდენობა ქვორუმისთვის საკმარისი არ აღმოჩნდა, რის გამოც სხდომა ჩაიშალა.

სხდომა დატოვეს ნაციონალური მოძრაობის 14-მა და ლელოს 1-მა დეპუტატმა. რაც შეეხება ექსპრემიერის პარტიას საქართველოსთვის, ნინო ბაციაშვილმა და აკაკი გვიანიძემ გუშინვე განაცხადეს, რომ სხდომას საერთოდ არ დაესწრებოდნენ. უცნობია, სხდომას ესწრებოდა თუ არა ამავე პარტიის სიით გასული დეპუტატი, ირაკლი თავდგირიძეც, რომელმაც 29 ოქტომბერს პარტია დატოვა და ახლა დამოუკიდებელი დეპუტატის სტატუსი აქვს.

სხდომის დასაწყისში ნაციონალური მოძრაობის წევრებმა უხუცეს წევრს, ქართული ოცნების დეპუტატ ნერიმან ცინცაძეს სთხოვეს, საკრებულოს უფლებამოსილების ცნობის შემდეგ მათთვის განცხადების გაკეთების საშუალება მიეცა. ცინცაძემ განაცხადა, რომ სხდომა პროცედურების შესაბამისად უნდა გამართულიყო და ნაციონალური მოძრაობის დეპუტატს, ნაზი ფუტკარაძეს სიტყვის გამოსვლის საშუალება არ მისცა — რამდენიმე წუთის განმავლობაში ისინი ერთმანეთის პარალელურად საუბრობდნენ.

"ჩემს ძმას უნდა წაეყვანა დღევანდელი სხდომა. უმძიმესი იყო დღეს ჩემთვის ამ სხდომაზე დასწრება, ამ ნაბიჯის გადმოდგმა, მაგრამ პასუხისმგებლობის გრძნობა მაქვს იმ მოქალაქეების მიმართ, ვინც ჩვენ მხარი დაგვიჭირა და დაგვაყენა იმ რეალობის წინაშე, რომ ბათუმში ოპოზიციური უმრავლესობა ვიყავით.

თქვენმა ხელისუფლებამ გააგრძელა ბოროტი ქმედებები, ზეწოლა, მოსყიდვის მცდელობა და ერთ ადამიანთან მიაღწია კიდევაც. მაგრამ, ჩემს ძმასთან [ვერ მიაღწია]. ეს არ იყო გარდაცვალება, ეს იყო მის ჯანმრთელობაზე გავლენის მოხდენა და ჩემი ძმის სიცოცხლის მოსპობა. მე ვითხოვ ობიექტურ გამოძიებას. თქვენი საკრებულო არ არის ის რეალობა, რაც ჩვენ მივიღეთ მოსახლეობის მხარდაჭერის მიხედვით", — ასე მიმართა ნაზი ფუტკარაძემ კოლეგებს, რის შემდეგაც სხვა ოპოზიციონერ დეპუტატებთან ერთად სხდომათა დარბაზი დატოვა.

ნაზი ფუტკარაძე საკრებულოს გარდაცვლილი დეპუტატის, ნუგზარ ფუტკარაძის დაა.

ლელოს დეპუტატი, ირაკლი კუპრაძე ამბობს, რომ ოპოზიცია არც მომდევნო სხდომებს დაესწრება, რათა ქვორუმი არ შედგეს.

"ჩვენ ვამბობთ, რომ ბათუმის საკრებულო იქნება ან ოპოზიციური, რასაც შეეწირა ნუგზარ ფუტკარაძის სიცოცხლე მისი ღირსებიდან გამომდინარე, ან ბათუმის საკრებულო არ იქნება ლეგიტიმური. ვერცერთ სხდომაზე ბათუმის საკრებულოში ვერ იქნება მიღწეული ქვორუმი. ეს არის ოპოზიციის ერთიანი გადაწყვეტილება, რასაც ყველა ვითვალისწინებთ და მივყვებით მხოლოდ და მხოლოდ ამ გზას [...]

სხდომა რამდენჯერაც არ უნდა ჩატარდეს, თუ ოპოზიცია არ იქნება უმრავლესობით წარმოდგენილი, ეს სხდომა ჩაიშლება და არ იქნება ლეგიტიმური", — განაცხადა ირაკლი კუპრაძემ.

გაიგე მეტი: