ჯანდაცვის მინისტრის, ეკატერინე ტიკარაძის განცადებით, არ არის გამორიცხული, მწვანე პასპორტთან დაკავშირებული ღონისძიებები გამკაცრდეს. იშეგახსენებთ, რომ მწვანე პასპორტები გუშინ, პირველ დეკემბერს ამოქმედდა.

ჯანდაცვის მინისტრის თქმით, საქართველო ემზადება ახალი შტამისთვის და გეგმავს გარკვეულ პრევენციულ ღონისძიებებს, მათ შორის, განიხილება PCR ტესტის ვალიდურობის შემცირება 72-დან 48 საათამდე.

"გუშინ შეიკრიბა კოვიდსაბჭო, რომელიც მოქმედებს ჯანდაცვის სამინისტროში და განიხილავს ვაქცინაციის ეფექტურობის და გეგმის შესახებ გარკვეულ სტრატეგიებს. ასევე, ტესტირებასთან მიმართებაში ვიმსჯელეთ, თუ რომელი ტესტირება იქნებოდა ახალი შტამის მიმართებაში მეტად უფრო ეფექტური, დავრჩებით ჩვენ სწრაფ ტესტებზე, თუ მხოლოდ PCR ტესტი იქნება მისაღები იმისთვის, რომ ადამიანი იყოს მწვანედ აღიარებული. ასევე, ტესტირების ვადებზე იყო საუბარი, ვინაიდან მსოფლიოში უკვე საუბრობენ, რომ PCR ტესტის 72-საათიანი ვალიდურობა შეიძლება არ იყოს საკმარისი ახალი შტამის შემთხვევაში და შეიძლება, ეს დრო იყოს დათქმული 48 საათად. საბჭომ იმსჯელა ამაზე, ჩვენი პროფესიონალები და ექსპერტები მოამზადებენ დასვკნას, რომელსაც სამშაბათს წარვადგენთ საბჭოზე, მივიღებთ დამატებით გადაწყვეტილებებს და მე არ გამოვრიცხავ, მნიშვნელოვნად გამკაცრდეს ყველა ის ღონისძიება, რომელიც შეეხება მწვანე პასპორტს და ასევე სხვა აღსრულების მექანიზმებს", — განაცახდა მან საზოგადოებრივი მაუწყებლის ეთერში.

მინისტრს კიდევ ერთხელ ჰკითხეს, რატომ არის ქვეყანაში 2 სხვადასხვა კოვიდპასპორტი, რაზეც მან განაცხადა, რომ ამ ეტაპისთვის მიზანშეწონილად ჩაითვალა, რომ საქართველოს მოქალაქეებისთვის კომპრომისული გადაწყვეტილება ყოფილიყო მიღებული.

"რომელიც გულისხმობს სწორედ ამ ორმაგი მწვანე საშვის ამოქმედებას, რომელთაგან ერთი მოქმედებს ევროკავშირსა და სხვა ქვეყნებში. ამ მწვანე პასპორტით ჩვენ დაერთებული ვართ 51 ქვეყანაზე, ანუ არამხოლოდ ევროკავშირის ქვეყნებზე, არამედ ნუსხა მოიცავს 51 ქვეყანას. საქართველოში ჩვენ გვაქვს კოვიდპასპორტი, რომელშიც არის შედარებით უფრო ლოიალური და კომპრომისული მიდგომა მწვანე სტატუსთან მიმართებაში, თუმცა აქაც ჩვენ ძალიან მალე დავდექით რთული გამოწვევის წინაშე. ჩვენ გვაქვს დღეს გამოწვევა ახალი შტამი, რომელიც მნიშვნელოვანი არის გათვალისწინებული იყოს დღევანდელი ეპიდვითარების პერიოდში. ვხედავთ, რომ სხვა ქვეყნები მიდიან სრულ ლოქდაუნზე და გერმანია, რომელიც მართავდა ეპიდვითარებას შეზღუდვების გარეშე, ამკაცრებს შეზღუდვებს. ანალოგიური ღონისძიებები ხორციელდება ავსტრიაშიც და არამხოლოდ ეს ორი ქვეყანა მიმართავს ამ მიდგომებს", — განაცხადა მან.

ტიკარაძე ამტკიცებს, რომ ორი პასპორტის გადაწყვეტილების მიღებისას "პოლიტიკური მდგენელი" არ ყოფილა და ისინი ითვალისწინებდნენ ქვეყნის ეკონომიკურ მდგომარეობას და მოსახლეობის ჯანმრთელობას.

"ასევე, მნიშნველოვანი არის ჩვენი ჩვენი მოქალაქეების ფსიქო-ემოციური მდგომარეობა და ის რეზისტენტობა, რომელიც ჩამოყალიბდა ამ დაღლის ფონზე, რომელიც ჩვენ უკვე 2 წელიწადია გვაქვს პანდემიიდან გამომდინარე. მნიშვნელოვანია, რომ ყველა ახალი რეგულაცია მეტად უფრო თანაბრად და სწორად იყოს ადამიანებზე მიწოდებული, რათა არ იყოს ის რეზისტენტობა, რომელიც პროცესს მეტად უფრო ავნებს, ვიდრე ხელს შეუწყობს განვითარებაში, სწორედ ეს გახლავთ მსჯელობის საგანი", — განაცხადა მან.

კითხვაზე, როგორია უშუალოდ მისი პოზიცია, უნდა ჰქონდეთ თუ არა უვადო კოვიდპასპორტები მოქალაქეებს, რომლებმაც კორონავირუსი თუნდაც წელიწად-ნახევრის წინ გადაიტანეს, ტიკარაძე პასუხობს:

"მე ისევ მივუბრუნდები მეცნიერებაზე დაყრდნობილ მტკიცებულებებს და ჩვენ არ გვაქვს მტკიცებულებები იმის, რომ ადამიანები, რომლებსაც წელიწად-ნახევრის წინ აქვთ გადატანილი კოვიდი, დღესაც არიან რეზისტენტულები. თუმცა ასევე არ გამოვრიცხავ, რომ შემდეგი ერთი წლის მანძილზე მეცნიერებმა აღმოაჩინონ და შემდეგ უკვე დაამტკიცონ ის, რომ კოვიდგადატანილები ყველაზე მეტად სარგებლობენ მდგრადი იმუნიტეტით. ამ ეტაპისთვის ეს ასე არ მტკიცდება, ყველაზე მდგრადი იმუნიტეტი ადამიანს აქვს ვაქცინაციის შემდეგ და ასევე, დამტკიცდა, რომ საჭირო არის ბუსტერ დოზა. გარდა ამისა, მნიშვნელოვანია აღინიშნოს რომ ახალი შტამის აღმოჩენის შემდეგ, მეცნიერები საუბრობენ იმაზე, რომ შეიძლება სავალდებულო არის 4 ვაქცინა, გამოვრიცხოთ საერთოდ ბუსტერ დოზა და ჩავთვალოთ, რომ სრულად ვაქცინირებულად ადამიანი იცვლება 4 დოზის შემდეგ. ეს ყველაფერი არის ძალიან ცვლადი".

საქართველოში მწვანე პასპორტები პირველ დეკემბერს ამოქმედდა. ქვეყანაში 2 აპლიკაცია მუშაობს მწვანე პასპორტის ასაღებად და შესაბამისად, ორი ტიპის მწვანე საშვი გვაქვს. ერთს ევროკავშირი აღიარებს და ამ აპლიკაციით მწვანე პასპორტს ვერ აიღებენ ისინი, ვინც კორონავირუსი 6 თვეზე მეტი ხნის წინ გადაიტანა. სწორედ ამიტომ შეიქმნა მეორე აპლიკაცია, სადაც იმ პირების კოდებიც ჩანს, ვისაც კორონავირუსი დიდი ხნის წინ აქვს გადატანილი.

ე.წ. უვადო მწვანე პასპორტი კორონაგადატანილებისთვის სამედიცინო სფეროს წარმომადგენლების მხრიდან კრიტიკის საგანი გახდა.

გაიგეთ მეტი:

• CovidPass Georgia და Georgia e-Health — რატომ გვაქვს 2 აპლიკაცია მწვანე პასპორტისთვის და რაში უნდა გამოვიყენოთ