ავსტრიაში ქირურგი მას შემდეგ დააჯარიმეს, რაც პაციენტს დაშავებულის ნაცვლად მეორე, ჯანსაღი ფეხის ამპუტაცია ჩაუტარა. ხანდაზმული პაციენტისთვის ექიმს მარჯვენა ფეხი უნდა მოეკვეთა და არა მარცხენა, ეს შეცდომა კი მხოლოდ ორი დღის შემდეგ აღმოაჩინეს.

სასამართლომ 43 წლის ქირურგი დაუდევრობაში დამნაშავედ ცნო და 3000 დოლარის გადახდა დააკისრა. პაციენტი სასამართლო პროცესამდე გარდაიცვალა და მის ქვრივს საკომპენსაციოდ 5000 დოლარი გამოუყვეს.

პაციენტი კლინიკაში მაისში მივიდა, რათა ფეხის ამპუტაციის ოპერაცია დაეგეგმა, მაგრამ ქირურგმა საოპერაციო გრაფაში შეცდომით მეორე კიდური მონიშნა. შეცდომა სახვევის გამოცვლის დროს გამოვლინდა, როცა პაციენტს უთხრეს, რომ მეორე ფეხის ამპუტაციაც ესაჭიროებოდა.

ინციდენტის დღეს საავადმყოფოში განაცხადეს, რომ ეს "არახელსაყრელი გარემოებების შედეგად" მოხდა და კლინიკის დირექტორმა საჯარო ბოდიშიც მოიხადა.

როცა სასამართლო პროცესზე ექიმს ჰკითხეს, თუ რატომ მონიშნა კიდური არასწორად, მან უპასუხა, რომ "უბრალოდ არ იცის". ამ შემთხვევის შემდეგ კი ის სხვა კლინიკაში გადავიდა.

ასეთი შემთხვევები ძალიან იშვიათია, თუმცა რამდენიმე ფაქტი მაინც დასტურდება. 1995 წელს აშშ-ში ექიმმა ნახევარი ოპერაციის შემდეგ აღმოაჩინა, რომ დიაბეტიან პაციენტს დაშავებულის ნაცვლად მეორე ფეხს ჭრიდა. თუმცა ის იძულებული იყო ოპერაცია გაეგრძელებინა, რადგან მყესები და კუნთები უკვე მოკვეთილი ჰქონდა.