სოფელ ვანელის მიმდებარედ ოკუპანტებმა საქართველოს მოქალაქე გაიტაცეს. სახელმწიფო უსაფრთხოების სამსახურის განცხადებით, ამოქმედებულია ყველა არსებული ბერკეტი და საერთაშორისო პარტნიორებთან ერთად მიმდინარეობს მუშაობა უკანონო პატიმრობაში მყოფი პირის გასათავისუფლებლად.

"უკანონო დაკავების ფაქტზე, მყისიერად გააქტიურდა ცხელი ხაზი და მოხდა ევროკავშირის სადამკვირვებლო მისიის ინფორმირება. მომხდარის შესახებ ეცნობა ჟენევის საერთაშორისო დისკუსიების თანათავმჯდომარეებსა და ჩვენს საერთაშორისო პარტნიორებს", — ნათქვამია სუს-ის განცხადებაში.

უწყებაში ამბობენ, რომ უკანონო დაკავება აზიანებს უსაფრთხო გარემოს და ართულებს ადგილობრივი მოსახლეობის ყოველდღიურ ცხოვრებას.