თითქმის 400 წლის შემდეგ ბარბადოსმა ბრიტანეთის მონარქიასთან კავშირი გაწყვიტა და რესპუბლიკა გახდა. ახალი რესპუბლიკის შექმნა დედაქალაქ ბრიჯშთაუნში 30 ნოემბრის დადგომასთან ერთად აღნიშნეს — ზუსტად ღამის 12 საათზე ის დროშა, რომელიც ბრიტანეთის დედოფალს წარმოადგენდა, დაუშვეს და ეროვნული კულტურული ფონდის აღმასრულებელმა დირექტორმა, კაროლ რობერტს-რეიფერმა ბარბადოსის ახალი კონსტიტუციური სტატუსი გამოაცხადა.

ღონისძიებაზე განსაკუთრებული ყურადღების ცენტრში მომღერალი რიანა აღმოჩნდა, რომელსაც მშობლიურმა ბარბადოსმა ეროვნული გმირის წოდება მიანიჭა. აღნიშნული წოდება რიანას გარდა კიდევ 10 ბარბადოსელს აქვს მინიჭებული.

"დაე, ბრილიანტივით იბრწყინო და შენს ქვეყანას სიამაყე მოუტანო შენი სიტყვებით, ქმედებებით და ასახელო მიუხედავად იმისა, თუ სად იმყოფები", — ქვეყნის პრემიერმინისტრმა მისალოც სიტყვაში არც რიანას ერთ-ერთი ჰიტი, სახელად Diamonds არ დავიწყებია.

აღსანიშნავია, რომ ბარბადოსმა განსაკუთრებული ღვაწლისთვის რიანა 2008 წელს კულტურის სფეროს ელჩადაც დაასახელა.

33 წლის რიანა ბარბადოსში დაიბადა და ბრიჯთაუნში იზრდებოდა. ის ამერიკელმა პროდიუსერმა ევან როჯერსმა აღმოაჩინა და მალე რიანა მსოფლიომ გაიცნო. მომღერალმა ბოლო ალბომი 2016 წელს გამოუშვა. ბოლო 5 წლის განმავლობაში ფანები საყვარელი მომღერლის ახალ ალბომს სულმოუთქმელად ელიან.

მუსიკის გარდა, რიანამ კოსმეტიკის ბრენდი Fenty Beauty და თეთრეულის ხაზი Savage x Fenty-იც შექმნა. აგვისტოში მომღერალი ფორბსის მილიარდერთა სიაში მოხვდა და მსოფლიოში უმდიდრესი მომღერალი ქალის სტატუსიც მიენიჭა.

ამავე თემაზე: