Forbes-ის მიხედვით, მილიარდერთა სიას 33 წლის პოპვარსკვლავი რიანაც შეუერთდა. რიანას ქონების ღირებულება $1,7 მილიარდს შეადგენს და ის მსოფლიოში უმდიდრესი მომღერალი ქალია, ხოლო შოუბიზნესში სიმდიდრით ქალებს შორის მხოლოდ ოპრა უინფრის ჩამორჩება.

მიუხედავად იმისა, რომ რიანა მსოფლიოს ერთ-ერთი წამყვანი მუსიკოსია, მისი ქონების უდიდესი ნაწილი ($1,4 მილიარდი) მომღერლის კოსმეტიკური ბრენდის — Fenty Beauty-ის დამსახურებაა. რიანა კომპანიის 50%-იანი წილის მფლობელია. დამატებით, $270 მილიონადაა შეფასებული რიანას თეთრეულის ბრენდი Savage x Fenty.

აღსანიშნავია, რომ რიანას კოსმეტიკის ბრენდი Fenty Beauty ინკლუზიური პროდუქციითაა გამორჩეული, რისი წყალობითაც ბრენდი უარს ამბობს სილამაზის ჩამოყალიბებულ სტანდარტებზე და ყველა ქალისათვის ხელმისაწვდომ პროდუქციას ქმნის. ამის დასადასტურებლად თუნდაც მხოლოდ ის კმარა, Fenty ტონალურ კრემს 50 სხვადასხვა ფერში უშვებს.

როგორც ჩანს, სილამაზის იმპერიის შენება რიანას დიდ დროს ართმევს — მომღერალმა ბოლო ალბომი 2016 წელს გამოუშვა. ბოლო 5 წლის განმავლობაში ფანები საყვარელი მომღერლის ახალ ალბომს სულმოუთქმელად ელიან.