სახალხო დამცველის, ნინო ლომჯარიას განცხადებით, ამერიკის შეერთებულ შტატებში მისი მთავარი თხოვნა და სათქმელი არის ის, რომ საჭიროა უფრო მეტი მხარდაჭერა იმისათვის, რომ ქვეყანაში დემოკრატიული პროცესების განვითარებას შეუწყონ ხელი.

"ჩემი მთავარი სათქმელი აქ იყო ის, რომ ადამიანის უფლებადამცველებს, დამოუკიდებელ დემოკრატიულ ინსტიტუტებს, განსაკუთრებით მედიას და მე მინდა კიდევ ერთხელ გავუსვა ხაზი იმას, რომ განსაკუთრებით ვაკეთებ აქცენტს იმაზე, თუ რამხელა მნიშვნელობა აქვს საქართველოში კრიტიკული მედიის და დამოუკიდებელი მედიის არსებობას, რომ მედია განსაკუთრებულ როლს ასრულებს ქვეყანაში დასავლური ღირებულებების გავრცელებასა და დაცვაში.

ამიტომ ჩემი მთავარი თხოვნა და სათქმელი აქ არის ის, რომ ჩვენ გვჭირდება უფრო მეტი მხარდაჭერა, განსაკუთრებით მედიის წარმომადგენლებს, ადამიანის უფლებადამცველებს, დემოკრატიის დამცველ ორგანიზაციებს და დამოუკიდებელ ინსტიტუტებს იმისათვის, რომ შევძლოთ ჩვენ ჩვენი საქმის გაკეთება, იმისათვის, რომ ერთობლივად ხელი შევუწყოთ საქართველოში დემოკრატიული პროცესების განვითარებას, რაც სამწუხაროდ, ჩემი მოსაზრებით, ბოლო წლებში არ მიდის იმ ტემპით და შეიძლება დემოკრატიის უკუსვლაზეც კი ვისაუბროთ", — განაცხადა ლომჯარიამ ჟურნალისტებთან საუბრისას.

სახალხო დამცველი ნინო ლომჯარია 29 ნოემბრიდან 3 დეკემბრის ჩათვლით ამერიკის შეერთებულ შტატებში ოფიციალური ვიზიტით იმყოფება, სადაც შეხვედრები იმართება სახელმწიფო დეპარტამენტში, კონგრესსა და სენატში. ასევე დაგეგმილია შეხვედრები საერთაშორისო რესპუბლიკური ინსტიტუტის (IRI), ეროვნული ფონდი დემოკრატიისთვის (NED), ფრიდომ ჰაუსისა და ამერიკის საერთაშორისო განვითარების სააგენტოს (USAID) წარმომადგენლებთან.