ქართული ოცნების საზოგადოებასთან ურთიერთობის მდივანი შალვა პაპუაშვილი მედია ჩეკერთან ინტერვიუში ამბობს, რომ სახელმწიფომ 5 ივლისს ჟურნალისტების დაცვა ვერ შეძლო. რაც შეეხება კითხვას, რამდენად უსაფრთხო გარემოა საქართველოში მედიის წარმომადგენლებისთვის, პაპუაშვილს მიაჩნია, რომ "ძალიან, უსაფრთხოა".

"ჟურნალისტი, რომელიც ამბობს, ქვეყანაში უსაფრთხო გარემო არ არისო, იმაზე უნდა დავფიქრდეთ, ხომ არ არის ეს ჟურნალისტი პროპაგანდის ნაწილი? შეიძლება, იმის თქმაც, უსაფრთხო გარემო არის თუ არა, პროპაგანდის ნაწილია.

ახლა დავუბრუნდეთ თქვენს კითხვას, შეძლო თუ ვერა სახელმწიფომ ჟურნალისტების დაცვა 5 ივლისს? ფაქტია, რომ ვერ შეძლო. იმიტომ, რომ გვყავს დაშავებულები", — ამბობს მმართველი პარტიის წარმომადგენელი მედია ჩეკერთან.

ჟურნალისტი, ასევე, ეკითხევა ქართული ოცნების ლიდერების აგრესიულ რიტორიკზე, რაც ოპოზიციური არხების მიმართ აქვთ, მათი ტერმინოლოგია, როგორც მოიხსენიებენ, ახალისებს თუ არა ძალადობას, რაზეც ის პასუხობს.

"არ ვიცი. თუ ეს იმას ნიშნავს, რომ ტყუილზე არ ვთქვათ — ტყუილია. მაგალითად, რომელიმე ჟურნალისტზე რომ თქვა არის თუ არა ეს მატყუარა ჟურნალისტი, ეს წამახალისებელია, თქვენი აზრით?"

ინტერვიუ სრულად შეგიძლიათ ნახოთ აქ.

5 ივლისის ღირსების მარშის საწინააღმდეგოდ, ჰომოფობიურმა და ძალადობრივმა ჯგუფებმა აქციები გამართეს. 5-6 ივლისს ჯამში 50-ზე მეტ ჟურნალისტს, სამოქალაქო მოძრაობების ოფისებსა და მშვიდობიან მოქალაქეებს დაესხნენ თავს. ამ მოვლენების გამო სამოქალაქო საზოგადოებისა და ოპოზიციის ნაწილი შინაგან საქმეთა მინისტრის პასუხისმგებლობის საკითხის დაყენებას ითხოვს, რადგან მიაჩნიათ, რომ მან მშვიდობიანი მოქალაქეების და ჟურნალისტების უსაფრთხოების დაცვა ვერ უზრუნველყო.