ბათუმის საკრებულოში, სადაც 2022 წლის ბიუჯეტს ამტკიცებდნენ, ნაციონალური მოძრაობის დეპუტატმა მირდატ ქამადაძემ მძაფრსუნიანი ნივთიერება გაუშვა. ქამადაძის განცხადებით, შპრიცში არსებული ნივთიერება ჯანმრთელობისთვის საშიში არ არის და ამის დასამტკიცებლად ის დარბაზში დაჩება.

"მგონია, რომ დღეს დღევანდელი საკრებულოს სხდომა არ უნდა ჩატარდეს ყოველგვარი ხმაურის გარეშე. ამიტომ მე ახლა საჯაროდ ხელთ მიჭირავს შპრიცი, რომელშიც არის ნივთიერება სრულიად უწყინარი, უბრალოდ აქვს ძალიან ისეთი სუნი, რომ აქ ვეღარ გაჩერდებით, პარლამენტში რაც იყო. აქედან გამომდინარე, მე ვრჩები ბოლომდე აქ, იმიტომ, რომ არ იფიქროს ვინმემ ეს ნივთიერება არის ჯანმრთელობისთვის საშიში. ამიტომ, ბოლო წუთამდე მე ვრჩები აქა", — განაცხადა ენმ-ს დეპუტატმა.

ამის შემდეგ ის პოლიციამ საკრებულოს შენობიდან გაიყვანა, საკრებულოს თავმჯდომარემ შესვენება გამოაცხადა.

დილიდან ხმაურია ბათუმში, აჭარის უმაღლესი საბჭოს შენობაში, სადაც საკრებულოს სხდომა მიმდინარეობდა. სხდომაზე ძველი საკრებულოს შემადგენლობა 2022 წლის ბიუჯეტის დამტკიცებას გეგმავდა. სწორედ ამას აპროტესტებდა იქ შეკრებილი ოპოზიცია — ადგილზე მობილიზებულია პოლიციაც.

ბათუმში აღნიშნულთან დაკავშირებით ხმაური იყო გუშინაც, ბიუროს სხდომაზეც. ოპოზიციონერმა დეპუტატებმა სხდომაზე შესვლა და ძველი საკრებულოს შემადგენლობის მიერ ბიუჯეტის დამტკიცების საკითხის გატანაში ხელის შეშლა სცადეს.

ოპოზიციის განცხადებით, მომავალი წლის ბიუჯეტი საკრებულოს ახალმა შემადგენლობამ უნდა დაამტკიცოს. მათივე თქმით, საკრებულოს არსებული შემადგენლობა არალეგიტიმურია და მათ ბიუჯეტის დამტკიცების უფლება არ აქვთ.

24 ნოემბერს ამაზე ისაუბრეს ნაციონალური მოძრაობის წევრებმა. მირდატ ქამადაძის განმარტებით, თუ საკრებულომ ბიუჯეტი ვერ დაამტკიცა, რიგგარეშე არჩევნების საჭიროება დადგება. მისი შეფასებით, სწორედ ამიტომ ცდილობს ხელისუფლება, რომ ბიუჯეტი ძველმა საკრებულომ დაამტკიცოს.

მისივე თქმით, როცა ქვეყანაში არ არსებობს ინსტიტუციები, სადაც, შეიძლება, ამ უსამართლობაზე იჩივლონ, უწევთ ყველა "ლეგიტიმური, ბუნებრივია, არაძალადობრივი" გზის გამოყენება, რომ ეს არ მოხდეს.