ევროპული საქართველოს ერთ-ერთი წევრის, ვახტანგ კალოიანის განცხადებით, ქართული ოცნება ანტივაქსერებეთან ბევრად უფრო გრძნობს "სულიერ სიახლოვეს", ვიდრე თანამედროვე მედიცინის ძირითად პრინციპებთან. ამის შესახებ მან ბრიფინგზე ისაუბრა და ხელისუფლების პანდემიის მართვის პოლიტიკა გააკრიტიკა.

"როგორც ეტყობა, პრემიერი ღარიბაშვილი და ქართული ოცნება ანტივაქსერებეთან ბევრად უფრო ახლოს გრძნობს სულიერ სიახლოვეს, ვიდრე თანამედროვე მედიცინის ძირითად პრინციპებთან, ამიტომ მთელი მათი პოლიტიკა ეპიდემიის მართვაში არის ერთგვარი კვერის დაკვრა და სიამოვნება ანტივაქსერული აგრესიული ჯგუფებისა, რის ფასსაც ვიხდით ჩვენ", — აღნიშნა მან.

მისივე თქმით, პანდემიის მართვაში საქართველო ყოველდღიურად ამყარებს ანტირეკორდებს და ეს დინამიკა არ შეწყდება, სანამ ხელისუფლება "პოპულისტური, პოლიტიკურად მოტივირებული" გადაწყვეტილებების მიღებას თავს არ დაანებებს.

24 ნოემბრის მონაცემებით, საქართველოში კორონავირუსის 3 201 ახალი შემთხვევა დადასტურდა, გამოჯანმრთელდა — 4 098, ხოლო გარდაიცვალა — 64 ადამიანი. აღსანიშნავია, რომ 22 ნოემბერს New York Times ბოლო 7 დღის მონაცემებზე დაყრდნობით წერდა, რომ 100 000 მოსახლეზე კორონავირუსით სიკვდილიანობის მაჩვენებლით საქართველო მსოფლიოში პირველ ადგილზეა.