ნიუ ჰოსპიტალსის ექიმის განცხადებით, შიმშილობის შემდგომ რეაბილიტაციაზე დროას ლიდერს, ელენე ხოშტარიას, შესაძლოა რამდენიმე დღე ან რამდენიმე კვირა დასჭირდეს. მისი თქმით, ეს ანალიზის შედეგებზეა დამოკიდებული.

"ამჟამად მიმდინარეობს ლაბორატორიული მონიტორინგი, ველოდებით ანალიზებს და იგეგმება რეაბილიტაციური ღონისძიებები. რეაბილიტაცია მოიცავს ინტრავენურ გადასხმებს, ვიტამინოთერაპიებს, ელექტროლიტურ კორექციას და ასე შემდეგ. პრევენციული ღონისძიებები უკვე მიმდინარეობს, ველოდებით ანალიზებს და ამის მიხედვით მოხდება კორექცია.

რეაბილიტაციას დასჭირდება რამდენიმე დღიდან რამდენიმე კვირამდე, გააჩნია ანალიზებს", — განუცხადა მან ჟურნალისტებს.

რამდენიმე საათის წინ ხოშტარიამ განაცხადა, რომ სააკაშვილის გადაყვანა გორის სამხედრო ჰოსპიტალში მისთვის შიმშილობის შეწყვეტის საფუძველია. შიმშილობის შემდგომი რეაბილიტაციისთვის ის ნიუ ჰოსპიტალში გადაიყვანეს. ადგილიდან ხოშტარიამ დაპოსტა, რომ თავს მშვენივრად გრძნობს და მადლობა გადაუხადა რესპუბლიკური საავადმყოფოს ექიმებს, ვახტანგ კალოიანსა და პარლამენტის ადმინისტრაციას.

დღეს, 19 ნოემბერს, ოპოზიციის აქციის პარალელურად, იუსტიციის მინისტრმა ბრიფინგი გამართა — უწყება ექსპრეზიდენტ მიხეილ სააკაშვილს გორის ჰოსპიტალში გადაყვანას სთავაზობს. ბრეგაძის მტკიცებით, გორის ჰოსპიტალი არის ადგილი, სადაც სააკაშვილის ჯანმრთელობა და უსაფრთხოება მაქსიმალურად იქნება დაცული. ჟურნალისტების კითხვას, როდის და როგორ გადაიყვანენ სააკაშვილს, ბრეგაძე პასუხობს, რომ ეს პროცედურა დაიგეგმება ექიმებთან და უსაფრთხოების თანამშრომლებთან ერთად, როდესაც სააკაშვილი დათანხმდება, გადავიდეს გორის სამხედრო ჰოსპიტალში და შეწყვიტოს შიმშილობა.

ამ წუთებში სააკაშვილის პოზიციის გასაგებად ეკა ხერხეულიძის ციხეში შესვლას ელოდებიან. ის აცხადებს, რომ აფერხებენ და ხელისუფლებას სთხოვს, არ შეაფერხონ, რადგან რაც მალე შეძლებს სააკაშვილთან საუბარს, მით მალე გავიგებთ ექსპრეზიდენტის აზრს სამხედრო ჰოსპიტალში გადასვლაზე.

ელენე ხოშტარიამ შიმშილობა 3 ნოემბერს დაიწყო. მან განაცხადა, რომ შიმშილობას არ შეწყვეტდა მანამ, სანამ სააკაშვილს სამოქალაქო კლინიკაში არ გადაიყვანდნენ.