2021 წლის საბავშვო ევროვიზიის გამარჯვებული სომხეთის წარმომადგენელი მალენა გახდა სიმღერით Qami Qami. მალენამ კონკურსის ჟიურისა და მაყურებლისგან ჯამში 224 ქულა მიიღო და ამით თავის ქვეყანას მეორე გამარჯვება მოუტანა.

რაც შეეხება საქართველოს წარმომადგენელ ნიკო ქაჯაიას, მან 163 ქულით მეოთხე ადგილი დაიკავა. ნიკომ წლევანდელ საბავშვო ევროვიზიაზე გიგა კუხიანიძის სიმღერა, Let's Count The Smiles, შეასრულა.

რიგით მე-19 საბავშვო ევროვიზია საფრანგეთის დედაქალაქ პარიზში გაიმართა. მუსიკალურ შეჯიბრებაში მონაწილეობას 19 ქვეყნის წარმომადგენელი იღებდა. წლევანდელი საბავშვო ევროფესტივალის დევიზი კი Imagine ("წარმოიდგინე") იყო.

საქართველო საბავშვო ევროვიზიაზე მონაწილეთა შორის ერთ-ერთი ყველაზე წარმატებული ქვეყანაა და ამ დრომდე რჩება კონკურსის რეკორდსმენად სამი გამარჯვებით; 2008 წელს პირველი გამარჯვება ჯერ ჯგუფმა ბზიკებმა მოიპოვა, 2011 წელს პირველადგილოსანი გახდა ჯგუფი ქენდი, 2016 წელს მალტაზე გამართული კონკურსი კი მარიამ მამადაშვილმა მოიგო. ამასთან, ქვეყანამ ევროვიზია ჯუნიორზე ორჯერ დაიკავა მეორე ადგილი და ოთხჯერ მოხვდა საუკეთესო ხუთეულში.