ქართული ოცნების თავმჯდომარე, ირაკლი კობახიძე ევროპარლამენტარ ანა ფოტიგასთან დაკავშირებით აცხადებს, რომ ის "კრიმინალების მფარველია" და "საქართველოს არ ცნობს სახელმწიფოდ". კობახიძის თქმით, სწორედ ამიტომ, ასეთ ადამიანებს სჭირდება "შესაბამისი მიდგომა" სახელმწიფოს მხრიდან.

"როდესაც შენ იუსტიციის მინისტრს წერ წერილს და ეუბნები, რომ გსურს პოლიტპატიმარ სააკაშვილთან შეხვედრა. როდესაც შენ პირდაპირ არ ცნობ სახელმწიფოს სახელმწიფოდ, არ აღიარებ სახელმწიფოს სახელმწიფოდ, ბუნებრივია, ამ შემთხვევაში ჩვენი პოზიციაც არის შესაბამისი და პოზიცია არის ის, რომ, ვინც არ აღიარებს სახელმწიფოს, ვინც საქართველოს არ ცნობს სახელმწიფოდ, მას სახელმწიფოს მხრიდან მიდგომაც უნდა ჰქონდეს შესაბამისი. კრიმინალების მფარველებს სჭირდებათ შესაბამისი მიდგომა", — განაცხადა მან იმედის ეთერში.

12 ნოემბერს საქართველოში ევროპარლამენტარი ანა ფოტიგა და ლიეტუველი პარლამენტარები ჩამოვიდნენ, მათი მიზანი ექსპრეზიდენტ მიხეილ სააკაშვილის ციხეში მონახულება იყო. ფოტიგა მოშიმშილე ელენე ხოშტარიას შეხვდა, თუმცა ორი დღის განმავლობაში ვერ შეძლო შესვლა საპატიმროში.

ოპოზიციურმა პარტიებმა გააკრიტიკეს ხელისუფლება და განაცხადეს, რომ მთავრობამ საბოლოოდ ზურგი შეაქცია ევროპას. ამ თემაზე ქართული ოცნების თავმჯდომარემ ვრცელი ფეისბუქპოსტი გამოაქვეყნა, სადაც ევროპელი პარტნიორების ნაწილი გააკრიტიკა და მათ რადიკალური ოპოზიციის უცხოელი ლობისტები უწოდა. ფოტიგას მიერ "პოლიტპატიმრების" ხსენების გამო, მან განაცხადა, რომ პარტნიორებმა ან უნდა აღიარონ, რომ საქართველო სახელმწიფოა, სადაც კანონი კანონობს, ან "მოუწევთ", რომ მათ უწოდონ "კრიმინალების მფარველები". კობახიძემ თქვა ისიც, რომ პარტნიორებთან სამომავლო ურთიერთობისას ამ პრინციპით იხელმძღვანელებენ და არ ითანამშრომლებენ მათთან, ვინც მიკერძოების გამო "საქართველოს სახელმწიფოდ არ ცნობს".

მმართველ გუნდს არაერთხელ გაუკრიტიკებია ანა ფოტიგა იმ კრიტიკული ტონის გამო, რასაც ევროპარლამენტარი მათდამი იჩენს. პრემიერმინისტრმა კი საარჩევნო კამპანიის დროს განაცხადა, რომ არც ფოტიგა, არც კუბილიუსი მისთვის და ქვეყნისთვის არაფერს არ წარმოადგენენ.