ქართული ოცნების თავმჯდომარის, ირაკლი კობახიძის განცხადებით, სახალხო დამცველისთვის ექსპრეზიდენტი მიხეილ სააკაშვილი "არის ნესტან-დარეჯანი, რომელიც საიდანღაც უნდა გამოიხსნას". ამის შესახებ მან იმედის ეთერში ისაუბრა და ასე გამოეხმაურა ომბუდსმენის შექმნილი კონსილიუმის დასკვნას, რომლის თანახმადაც, მკურნალობის გაგრძელება გლდანის დაწესებულებაში სახიფათოა.

"ნინო ლომჯარიასთვისაც სააკაშვილი არის ნესტან-დარეჯანი, რომელიც საიდანღაც უნდა გამოიხსნას და იცის რომ გლდანიდან ვერ გამოიხსნის, მაგრამ შეიძლება სადღაც გორის ჰოსპიტალიდან ან რომელიმე სხვა ასეთი ტიპის კლინიკიდან გამოიხსნას. ეს არის მარტივი რამ. იგივე ინტერესი აქვთ, ბუნებრივია, სააკაშვილის სხვა თანამზრახველებს, ეს არის მარტივი ინტერესი", — განაცხადა მან.

ირაკლი კობახიძეს აქამდეც არაერთხელ დაუდანაშაულებია სახალო დამცველი პარტიულობასა და მიკერძოებულობაში. 25 ოქტომბერს მან განაცხადა, რომ ნინო ლომჯარია ნაციონალური მოძრაობის "ერთ-ერთ რიგით აქტივისტად აქციეს". ამასთანავე, კობახიძე პოლიტიკურად მიკერძოებულს უწოდებს ომბუდსმენის მიერ შექმნილი ექიმთა კონსილიუმის წევრებსაც.

ხელისუფლების კრიტიკის შემდეგ ომბუდსმენს აშშ-ის ელჩი საქართველოში კელი დეგნანი და ევროპარლამენტარები გამოექომაგნენ, რომლებმაც აღნიშნეს, რომ სახალხო დამცველის ინსტიტუტი კრიტიკას ნაცვლად, ქებას იმსახურებს.

დღეს სახალხო დამცველის მიერ შექმნილმა ექიმების კონსილიუმმა მიხეილ სააკაშვილის ჯანმრთელობის მდგომარეობაზე დასკვნა გამოაქვეყნა. მათი შეფასებით, ექსპრეზიდენტის მდგომარეობა კრიტიკულია და მკურნალობის გაგრძელება რეკომენდებულია ფუნქციურად გამართულ, დიდი გამოცდილების მქონე პოლიპროფილურ ჰოსპიტალში. ექიმების დასკვნის მიხედვით, ამ პირობებს მე-18 დაწესებულების კლინიკა არ აკმაყოფილებს.