სახელმწიფო უსაფრთხოების სამსახურის ინფორმაციით, საოკუპაციო ძალების მიერ უკანონოდ დაკავებული გენადი ბესტაევი უკვე საქართველოს ხელისუფლების კონტროლირებად ტერიტორიაზე იმყოფება. უწყების განცხადებით ბესტაევი ერთ-ერთ სამედიცინო დაწესებულებაში მკურნალობს და მას ყველა საჭირო სამედიცინო მომსახურება გაეწევა.

ბესტაევის საქართველოს კონტროლირებად ტერიტორიაზე გადმოყვანის შესახებ ინფორმაცია 2 საათის წინ გავრცელდა. სუს-ის ცნობით გუშინ, 15 ნოემბერს ოკუპირებული ცხინვალის ე.წ. ციხეში ბესტაევს ინსულტი განუვითარდა. ქართულმა მხარემ ჟენევის თანათავმჯდომარეებსა და ევროკავშირის სადამკვირვებლო მისიასთან ერთად ბესტაევის მის მიერ კონტროლირებად ტერიტორიაზე გადმოყვანა მოითხოვა.

გენადი ბესატაევი საოკუპაციო ძალებმა 2019 წლის 21 ნოემბერს უკანონოდ დააკავეს. მიმდინარე წლის 2 მარტს ოკუპირებული ცხინვალის ე.წ. სასამართლომ მას 3 წლით უკანონო პატიმრობა მიუსაჯა.