ექსპრეზიდენტის ადვოკატი, ნიკა გვარამია აცხადებს, რომ მიხეილ სააკაშვილის მდგომარეობა წინა დღეებთან შედარებით გაუარესებულია და მას გადაადგილების შესაძლებლობაც აღარ აქვს. გვარამიას თქმით, ის შეხვედრების ოთახში "კედელ-კედელ" შევიდა.

"ასეთი ფერის მიხეილ სააკაშვილი რამდენი დღის წინ რომ ვიყავი შესული, არ იყო. ასე სუსტადაც არ იყო, იმიტომ, რომ ადამიანი შემოვიდა, კედელ-კედელ ასე ვთქვათ. რეალურად, ვერ დგას წესიერად ფეხზე. რამდენად სწორია საერთოდ, რომ ჩამოჰყავთ, არ ვიცი, მე თვითონაც უხერხულად ვგრძნობ თავს უკვე, რომ ჩემ გამო უნდა ჩამოვიდეს, რა საქმეც არ უნდა იყოს. ადამიანს უბრალოდ არ აქვს კარგი შესაძლებლობა, კი არა და, პრაქტიკულად, აღარ აქვს, რომ გადაადგილდეს, რამდენჯერმე ადგა ფეხზე და თავბრუ კი არ ეხვევა, უბრალოდ, ჩანს რომ ქანაობს ადამიანი და ვერ იკავებს თავს", — აცხადებს ის.

გვარამიას თქმით, მიხეილ სააკაშვილის ჯანმრთელობის მდგომარეობა უკვე ადვოკატების და სხვა პირების შეფასების ამარაა დარჩენილი, რადგან კონსილიუმს მასთან შესვლის უფლებას აღარ აძლევენ.

"კონსილიუმი დაშალეს, ვერ გავიგეთ ოღონდ საპირისპირო ილაპარაკა იუსტიციის მინისტრმა და სხვა თქვა პენიტენციურმა დეპარტამენტმა. როდემდე უნდა გაგრძელდეს ეს, არ ვიცი, მე ვფიქრობ, რომ უკუთვლა არის ახლა ჩართული", — თქვა მან.

კონსილიუმის წევრებს ექსპრეზიდენტი რამდენიმე დღეა არ უნახავთ. ვრცელდებოდა ინფორმაცია, თითქოს მიხეილ სააკაშვილს მათთან შეხვედრა არ სურს, რაც მისმა ადვოკატებმა უარყვეს. 14 ნოემბერს შოთა თუთბერიძემ განაცხადა, რომ სააკაშვილის პოზიცია კონსილიუმს აცნობეს, ამიტომ ექიმებს იმავე დღეს ელოდებოდნენ. საღამოს კი ცნობილი გახდა, რომ ორსაათიანი ლოდინის შემდეგ კონსილიუმი ციხეში არ შეუშვეს იმ მოტივით, რომ არასამუშაო საათები იყო.

გარდა ამისა, ექსპრეზიდენტი და მისი ადვოკატები მოითხოვენ, სახალხო დამცველის ეგიდით შეიქმნას ახალი კონსილიუმი პარიტეტული მოტივებით, რომელშიც 8 ექიმი სააკაშვილის, 8 კი სახელმწიფოს სურვილით შევა. ომბუდსმენმა განაცხადა, რომ მისი აპარატი ვერ ჩაანაცვლებს სახელმწიფოს პასუხისმგებლობას პატიმრის ჯანმრთელობაზე ზრუნვის კონტექსტში და ვერ განსაზღვრავს პაციენტის მკურნალობის ტაქტიკას. ლომჯარია მიიჩნევს, რომ არსებულმა კონსილიუმმა არათუ უნდა შეწყვიტოს ფუნქციონირება, უფრო ინტენსიურად უნდა განაგრძოს.

მიხეილ სააკაშვილი 47-ე დღეა შიმშილობს. სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ გლდანის ციხის სამკურნალო დაწესებულებაში გადაიყვანეს.

სტრასბურგის სასამართლოს გადაწყვეტილების შემდეგ მან განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.