დროას დამფუძნებლის, ელენე ხოშტარიას ექიმი, ვახტანგ კალოიანი აცხადებს, რომ მეტადაა გამოხატული სისუსტე, ინტოქსიკაცია, რაც შიმშილობის მე-12 დღეს მოსალოდნელი იყო. მისივე თქმით, მდგომარეობა არ არის კრიტიკული, მაგრამ შიმშილობის ამ ტემპით გაგრძელება ხოშტარიას სიცოცხლისა და ჯანმრთელობისთვის პირდაპირი საფრთხე იქნება.

"დღეს არის შიმშილობის მე-12 დღე. სიტუაცია ვითარდება, სამწუხაროდ, ლოგიკის მიხედვით, რაც ახასიათებს შიმშილობას, მეტად არის გამოხატული სისუსტე, მეტად არის გამოხატული ინტოქსიკაცია. იყო რამდენიმე ღებინების ეპიზოდი, რაც ინტოქსიკაციის მაჩვენებელია. [...]

გარკვეული სამედიცინო მანიპულაციები, რაც შესაძლებელია, რომ ამ პირობებში ჩატარდეს, მას უტარდება. დღეს დაგეგმილია გარკვეული ჩარევებიც, ლაბორატორიული ანალიზების კონტროლიც", — ამბობს კალოიანი.

როგორც კალოიანი აცხადებს, მისი ჯანმრთელობის მდგომარეობის გასაუმჯობესებლად საუკეთესო გამოსავალი შიმშილობის შეწყვეტაა, რაზეც ხოშტარია კატეგორიულ უარს აცხადებს.

ცოტა ხნით ადრე ხოშტარიას ჯანმრთელობაზე კომენტარი პარტიის წევრმა, ნინო გოგუაძემაც გააკეთა და აღნიშნა, რომ ანალიზების მიხედვით, პარამეტრები მძიმდება და მდგომარეობა კარგი არ არის.

ელენე ხოშტარია საკანონმდებლო ორგანოში მე-12 დღეა შიმშილობს, ის მიხეილ სააკაშვილის სამოქალაქო კლინიკაში გადაყვანას ითხოვს. ხოშტარია მკურნალობის მხოლოდ იმ ფორმებს თანხმდება, რაც კრიტიკული მაჩვენებლების გასაუმჯობესებლად არის საჭირო.