პენიტენციური სამსახური ისევ ამბობს, რომ ექსრეზიდენტ მიხეილ სააკაშვილის მდგომარეობა სტაბილურია. მათი განცხადებით, სიცრუეა, გავრცელებული ინფორმაცია, თითქოს სააკაშვილის ჯანმრთელობის მდგომარეობის გაუარესების გამო #18 დაწესებულების მიმდებარედ სასწრაფო სამედიცინო დახმარების ბრიგადის მობილიზება გახდა საჭირო.

უწყების განცხადებით, საუბარი, თითქოს გადაუდებელი დახმარების შემთხვევაში სააკაშვილს დაწესებულებაში დროული დახმარება ვერ ჩაუტარდება, არის გაზვიადებული და საზოგადოების შეცდომაში შეყვანის მცდელობაა.

"განვმარტავთ, რომ მიხეილ სააკაშვილის ჯანმრთელობის მდგომარეობა არის სტაბილური და ის მედპერსონალის მუდმივი მეთვალყურეობის ქვეშ იმყოფება. იმის მიუხედავად, რომ მიხეილ სააკაშვილს არ საჭიროებს რაიმე ტიპის სარეანიმაციო ღონისძიებებს. პრევენციის მიზნით, იგი იმყოფება იმ პალატაში, რომელიც სწორედ რეანიმაციის გვერდით მდებარეობს. დაწესებულების სარეანიმაციო პალატა კი აღჭურვილია თანამედროვე ყველა საჭირო ტექნიკით, ასევე ყველა აუცილებელი მედიკამენტით. საჭიროების შემთხვევაში კი მიხეილ სააკაშვილს შესაბამისი სამედიცინო დახმარება, პატიმრების ყოველგვარი ევაკუაციის გარეშე, მყისიერად ჩაუტარდება", — აცხადებენ უწყებაში.

რამდენიმე წუთის წინ პენიტენციური დაწესებულება დატოვა ექსპრეზიდენტის პირადმა ექიმმა. როგორც ნიკოლოზ ყიფშიძემ განაცხადა, მიხეილ სააკაშვილს ძლიერი სისუსტე აქვს და დღეს პირველი დღეა, როცა ის ფეხზე ვერ ადგა. მისივე თქმით, ტკივილები სააკაშვილს არ აქვს და კალიუმის მაჩვენებელი დაბალია.

ყიფშიძე განმარტავს, რომ საკაშვილი შიმშილობას აგრძელებს. ექსპრეზიდენტი უკვე 44-ე დღეა შიმშილობს.