საქართველოში აზიური ფაროსანას წინააღმდეგ საბრძოლველად 12 მილიონ ლარზე მეტი დაიხარჯება. თხილის ფართობების აზიური ფაროსანას წინააღმდეგ გასატარებელი ღონისძიებებისთვის თანხის გამოყოფის შესახებ განკარგულება მთავრობამ მიმდინარე წლის 24 მარტს მიიღო.

ამ თანხიდან საქართველოს სოფლის მეურნეობის სამინისტროს 2017 წლის სახელმწიფო ბიუჯეტიდან 7 574 400 ლარი გამოიყოფა, დარჩენილი - 4 854 400 ლარი კი, USAD-ის პროგრამა REAP-ის ფარგლებში გამოყოფილი გრანტია. ამის შესახებ On.ge-ს სურსათის უვნებლობის სამსახურის პრესსამსახურში განუცხადეს.

განკარგულებიდან ირკვევა, რომ 4 854 400 ლარი აზიური ფაროსანას წინააღმდეგ თხილის ფართობების დამუშავებისთვის საჭირო მუშახელის შრომის ანაზღაურების დაფინანსებას მოხმარდება.

საქსტატის 2016 წლის წინასწარი შედეგების მიხედვით, გასულ წელს საქართველოდან 179 მილიონი ამერიკული დოლარის ღირებულების თხილი გავიდა, რაც საქართველოდან ექსპორტირებული პროდუქტის 9 პროცენტია. თხილი საქართველოდან ექსპორტირებული პროდუქტის სამეულში მეორე ადგილზეა. საქართველოდან ექსპორტირებულ პროდუქტში პირველი ადგილი სპილენძის მადნებსა და კონცენტრანტებს უკავიათ. ღვინო კი ათეულში ხვდება, თუმცა, თითქმის ორჯერ ჩამორჩება ქვეყნიდან გატანილი თხილის მოცულობას.