დღეს, 27 მაისს, გალში ინციდენტების პრევენციისა და მათზე რეაგირების მექანიზმის ჯგუფის შეხვედრა ოთხწლიანი პაუზის შემდეგ გაიმართება. შეხვედრის მთავარი განსახილველი საკითხი საოკუპაციო ხაზთან, სოფელ ხურჩაში მომხდარი მკვლელობა იქნება.

როგორც ცნობილია, ქართული მხარე შეეცდება გაარკვიოს, უკვე დააკავეს თუ არა გიგა ოთხოზორიას მკვლელობაში ბრალდებული რაშიდ კანჯიოღლი.

"დაკავების შესახებ ინფორმაცია ვრცელდება, მაგრამ ჩვენ ვერ ვადასტურებთ. ჩვენ ველოდებით სწორედ ინციდენტების პრევენციისა და მათზე რეაგირების მექანიზმის შეხვედრას, სადაც მატ შორის ამ საკითხზეც გვექნება საუბარი. რა თქმა უნდა, ქართული მხარის პოზიცია არის ის, რომ ის წარსდგეს კანონის წინაშე", - განაცხადა შერიგების საკითხებში სახელმწიფო მინისტრის მოადგილებმ, ქეთევან ციხელაშვილმა.

ხურჩაში მომხდარ ტრაგიკულ შემთხვევასთან დაკავშირებით ქართულმა მხარემ ინტენსიური შეხვედრები უკვე გამართა საქართველოში ევროკავშირის სადამკვირვებლო მისიასთან და ჟენევის საერთაშორისო მოლაპარაკებათა ფორმატის თანათავმჯდომარეებთან.

გარდა ამისა, ქვეყნის მთავარი პროკურორის, ირაკლი შოთაძის თქმით, ქურთულმა მხარემ უკვე მიმართა ინტერპოლს იმისთვის, რომ გიგა ოთხოზორიას მკვლელობაში ბრალდებულზე ძებნა საერთაშორისო დონეზე გამოცხადდეს.

19 მაისს, საოკუპაციო ხაზთან, სოფელ ხურჩაში, ე.წ. მესაზღვრემ საქართველოს მოქალაქე ცეცხლსასროლი იარაღით მოკლა.