პარტია დროას ლიდერის, ელენე ხოშტარიას განცხადებით, აქციებზე ხალხის დაკავება პოლიციისა და ხელისუფლების ისტერიული ქცევაა. ის მთავრობას მიმართავს და ეუბნება, რომ ვერ დააკავებენ ყველა იმ ადამიანს, ვინც უმრავლესობაშია და არ ეგუება სიცოცხლის უფლების გათელვას, ძალადობასა და უსამართლობას.

"წარმოუდგენლად დიდია სია იმ ხალხის, ვინც დღეს დააკავეს და ეს მხოლოდ და მხოლოდ ხელისუფლების ისტერიკაზე მოქმედებს. ვერ დააკავებთ ყველა იმ ადამიანს, ვინც დღეს ამ ქვეყანაში არის უმრავლესობაში. ადამიანები, რომლებიც არ ეგუებიან არც სიცოცხლის უფლების გათელვას, არც თავისუფლების დაკარგვას, არც ძალადობას და არც უსამართლობას. ამიტომ, ძალიან მნიშვნელოვანია, რომ ჩვენ გავაგრძელოთ ესეთივე შემართებით. მე გული მწყდება, რომ ამ მომენტში ფიზიკურად არ ვარ ჩემი მეგობრების გვერდით, მაგრამ, რა თქმა უნდა, აქედან ვამხნევებ ყველას, ყველა დაკავებულს და ყველა ჩემს მეგობარს, ვინც იბრძვის", — განაცხადა ხოშტარიამ.

ყოფილი პრეზიდენტის, მიხეილ სააკაშვილის სამოქალაქო კლინიკაში გადაყვანის მოთხოვნით, დღეს 3 სხვადასხვა ადგილას აქცია გაიმართა. აქტივისტები ჯანდაცვისა და იუსტიციის სამინისტროებთან, ასევე, სახელმწიფო უსაფრთხოების სამსახურის შენობასთან შეიკრიბნენ — ჯერ კიდევ აქციების დაწყებამდე პოლიციამ მათი დაკავება დაიწყო. შინაგან საქმეთა სამინისტროს ინფორმაციით, დღეს გამართულ აქციებზე ჯამში 46 პირია დაკავებული.

აქციის მონაწილეებმა სასამართლოსთან გადაინაცვლეს, სადაც მიხეილ სააკაშვილის პროცესი მიმდინარეობს. პენიტენციურმა სამსახურმა სააკაშვილს სასამართლო სხდომაზე დასწრებაზე უარი უთხრა.