იუსტიციის მინისტრის რატი ბრეგაძის განმარტებით, ექსპრეზიდენტი მიხეილ სააკაშვილი გლდანის დაწესებულებაში გადაიყვანეს, რადგან მან უარი თქვა მკურნალობის არსებით ნაწილზე და ჯანმრთელობის მდგომარეობის რისკის მინიმალიზაცია იყო საჭირო. მისი თქმით, სააკაშვილის მეთვალყურეობა აქ უფრო უკეთესი იქნება.

"მიხეილ სააკაშვილმა უარი განაცხადა მკურნალობის არსებით ნაწილზე, რომელიც მას უტარდებოდა და შესაბამისად რისკი იმისა, რომ მისი ჯანმრთელობის მდგომარეობა გაუარესებულიყო შეიქმნა მზარდი. ბუნებრივია, იქმნებოდა მსგავსი ტიპის რისკი და შესაბამისად, ჯანმრთელობის მდგომარეობის რისკის მინიმალიზაციისა და პრევენციის გამო მიღებული იქნა ეს გადაწყვეტილება", — განაცხადა მან იმედის ეთერში.

ამავდროულად ბრეგაძე იმეორებს სუს-ის ბრიფინგს და ამბობს, რომ სხვა დაწესებულებაში გადაყვანის შემთხვევაში, კონკრეტული პირები შეეცდებოდნენ გზების ჩახერგვას და ხელშეშლას. მისი თქმით, ის გლდანის ციხეში უსაფრთხოების მოტივის გამოც გადაიყვანეს.

"ჩვენ გვქონდა, რა თქმა უდნა, სხვა ინფორმაციაც და ზოგადად ამ პატიმრის ირგვლივ არსებული სიტუაცია წარმოადგენს მომეტებული საფრთხის წყაროს. შესაბამისად, ჩვენი ამოცანა მდგომარეობს იმაში, რომ პატიმრის ჯანმრთელობის მდგომარეობა იყოს სტაბილური და მის უსაფრთხოებას საფრთხე არ შეექმნას. სწორედ ამ მოტივების გამო ის იქნა გადაყვანილი შესაბამის დაწესებულებაში", — განაცხადა მან.

რაც შეეხება გადაყვანის საკითხს, მისი თქმით, რადგან მათი "ოპონენტები ცდილობდნენ გარკვეულ ხელშეშლას" პენიტენციურმა სამსახურმა ის უსაფრთხოდ გადაიყვანა. მან არ დააზუსტა დეტალები, სააკაშვილი თვითმფრინავით გადაიყვანეს თუ ბრონირებული მანქანით.

ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის მე-12 პენიტენციური დაწესებულებიდან გლდანის მე-18 დაწესებულების საავადმყოფოში გადაიყვანეს. ეს ინფორმაცია პენიტენციურმა სამსახურმა ერთი საათის შემდეგ დაადასტურა მას შემდეგ, რაც რუსთავის ციხის ეზოში ვერტმფრენი გამოჩნდა. ამ დროის განმავლობაში მის ადვოკატებსა და ოჯახის წევრებს, ისევე, როგორც სახალხო დამცველს, არ ჰქონდათ ინფორმაცია სააკაშვილის ადგილსამყოფელის შესახებ.