როდესაც პერუს დედაქალაქ ლიმაში მცხოვრებმა მარიბელ სოტელომ 6 თვის წინ უსაყვარლესი ლეკვი შეიძინა, ოჯახის წევრებს წარმოდგენა არ ჰქონდათ, რომ საქათმეში მელა პირდაპირი მნიშვნელობით შეუშვეს.

თავდაპირველად "ცუგა" მეზობლების ძაღლებთან ერთად მშვენივრად ერთობოდა, თუმცა გაზრდასთან ერთად, ოჯახის წევრებმა მასში მოულოდნელი თვისებები შენიშნეს. "ძაღლს" ქათმებისა და იხვების დევნა ძალიან მოსწონდა. თუმცა ეს გასართობი მალე იმით დასრულდა, რომ "ძაღლმა" მეზობლების შინაური ფრინველები შეჭამა.

გაბრაზებული მეზობლების საყვედურები არ ილეოდა. ზოგიერთმა "ძაღლი" ზღვის გოჭების შეჭმაშიც დაადანაშაულა. ოთხფეხა მეგობრის უცნაური თვისებით შეშფოთებულმა პატრონმა კი მალე აღმოჩინა, რომ მაღაზიაში ძაღლი კი არა, ანდური მელა უყიდია.

რამდენიმე დღის წინ მელა სახლიდან გაიქცა და დღეს მას ოჯახის წევრები, ეკოლოგიური პოლიცია და ტყისა და ველური ბუნების დაცვის სამსახურის წარმომადგენლები ეძებენ. მელიას გარეული ცხოველებისთვის განკუთვნილ სპეციალურ დაწესებულებაში ან ზოოპარკში დააბინავებენ.

ტყისა და ველური ბუნების დაცვის სამსახურის ვეტერინარის, უოლტერ სილვას თქმით, აღნიშნული შემთხვევა უკანონო ნადირობის შედეგია. მონადირეები ახალშობილების მშობლებს ხოცავენ, მათ კი არალეგალურ ბაზრებზე ყიდიან. სწორედ ასე აღმოჩნდა მელია მარიბელ სოტელოს ოჯახში.

ცხოველების არალეგალური გაყიდვა პერუში სისხლისსამართლებრივი დანაშაულია და 3-დან 5-წლამდე პატიმრობას ითვალისწინებს.