რუსთავის ციხესთან სამართალდამცავებმა ოპოზიციის წარმომადგენლებს აქციისთვის სცენის გაშლის საშუალება არ მისცეს, ტექნიკა ჩამოართვეს და ტერიტორიიდან წაიღეს.

ქვემო ქართლის პოლიციის დეპარტამენტის დირექტორმა ჟურნალისტებთან განმარტა, რომ აქციის ორგანიზატორები სცენის სხვა ადგილას მოწყობაზე არ დათანხმდნენ და ტექნიკაც ამიტომ ჩამოართვეს.

"უარი განგვიცხადეს, რომ სცენას ვერ შევატრიალებთო. ციხის უსაფრთხოებიდან გამომდინარე, სადაც უნდათ სცენის გაშლა არ შეიძლება, ვეუბნებით ალტერნატიულ ადგილს, მაგრამ ამ ალტერნატიულ ადგილზეც არ დაგვთანხმდნენ", — განაცხადა მან.

დღეს, 17:00 საათზე, რუსთავის ციხესთან, სადაც ექსპრეზიდენტი მიხეილ სააკაშვილი შიმშილობს, აქცია გაიმართება. ნაციონალური მოძრაობის თავმჯდომარის, ნიკა მელიას თქმით, არ დაიშლებიან, სანამ სააკაშვილს სამოქალაქო საავადმყოფოში არ გადაიყვანენ.

სახელმწიფო უსაფრთხოების სამსახურის განცხადებით, 6 ნოემბრიდან ნაციონალურ მოძრაობას, გარდა რუსთავისა, აქციები დაგეგმილი აქვს თბილისშიც. მათი მტკიცებით, ენმ აპირებს სახელმწიფო დაწესებულებების შენობების ბლოკირებას და რუსთავის ციხესთან გზის გადაკეტვას. სუს ამტკიცებს იმასაც, რომ აქციებზე იგეგმება ძალოვანი სტრუქტურების ყოფილი თანამშრომლების ჩართვა, ასევე, ძალოვანი სტრუქტურების ცალკეული თანამშრომლის გადაბირება და განიხილება ერთ-ერთი ოპოზიციური ლიდერის ლიკვიდაციის შესაძლებლობასაც.