განათლების სამინისტროს ინფორმაციით, ქვეყნის მასშტაბით დისტანციურ სწავლებაზე 172 სკოლა, 408 კლასი და რისკ ჯგუფის 196 მასწავლებელი იმყოფება.

მათივე ცნობით, ბოლო ერთ კვირაში კორონავირუსი დაუდასტურდა მასწავლებლების 1%-ს, ხოლო მოსწავლეების — 0,4%-ს. ამასთან, სამინისტროს განცხადებით, ამ ეტაპისთვის აცრილია მასწავლებელთა და სკოლის ადმინისტრაციის წარმომადგენელთა 70%.

"საქართველოს განათლებისა და მეცნიერების სამინისტრო სკოლებში Covid-19- ის ვირუსის პრევენციის მიზნით აქტიურად მუშაობს სხვადასხვა მიმართულებით. ასევე, აქტიურად მიმდინარეობს Covid-19-ზე მასწავლებელთა ტესტირება. სკოლები სრულად არიან აღჭურვილი პანდემიის პრევენციისათვის სასწავლო წლის ბოლომდე საჭირო რესურსების მარაგით", — აღნიშნავენ სამინისტროში.

განათლებისა და მეცნიერების სამინისტრო კიდევ ერთხელ მოუწოდებს სასკოლო საზოგადოებას, მაქსიმალურად დაიცვან ჯანდაცვის სფეროს რეკომენდაციები და აქტიურად ჩაერთონ ვაქცინაციის პროცესში.