სარეკლამო სააგენტო ლივინგსტონის თანადამფუძნებელი, ლევან ლეფსვერიძე, კრეატიული ინდუსტრიის ერთ-ერთი ყველაზე პრესტიჟული ფესტივალის, Eurobest 2021-ის ჟიურის წევრებს შორისაა. მნიშვნელოვანია, რომ ის პირველი ადამიანია საქართველოდან, რომელიც ფესტივალის ჟიურის წევრებს შორის მოხვდა.

"ის [ლევანი] არის ყველაზე ტიტულიანი კრეატიული დირექტორი საქართველოში, დარგის პიონერი ენთუზიასტი, რომელმაც შეძლო პირველი ისტორიული კანის ლომისა და სხვა ჯილდოების სამშობლოში ჩატანა", — ვკითხულობთ ფესტივალის ვებგვერდზე.

ერთი მხრივ მეამაყება, რომ წელს ევროპის პრესტიჟულ ფესტივალზე ჟიურის შემადგენლობაში საქართველოც ფიგურირებს, ხოლო მეორე მხრივ, ძალიან მიხარია, რომ საშუალება მეძლევა საუკეთესო ნამუშევრებს ექსკლუზიურად გავეცნო კოლეგებთან ერთად. ეს თავგადასავალი უაღრესად შთამაგონებელია,

აღნიშნავს ლევანი On.ge-სთან საუბარში.

Eurobest კანის ლომების ფესტივალის ნაწილია, სადაც ევროპის გამორჩეული სააგენტოები იყრიან თავს და თავიანთ ნამუშევრებს წარადგენენ.