დღეს, 26 მაისს, ექსპო ჯორჯიას მე-11 პავილიონში, თბილისის წიგნის მე-18 საერთაშორისო ფესტივალი გაიხსნა და 29 მაისის ჩათვლით გაგრძელდება.

ფესტივალზე 60-მდე მონაწილეა დარეგისტრირებული. ორგანიზატორების განცხადებით, დაგეგმილია ლიტერატურული ღონისძიებები, ახალი წიგნების პრეზენტაციები, შეხვედრები ავტორებთან, დისკუსიები, საჯარო კითხვა, პროფესიული სემინარები, ლიტერატურული დაჯილდოება, წლის ბლოგერის გამოვლენა.

თბილისის მერიის მიერ გავრცელებული განცხადებით, წიგნის მე-18 საერთაშორისო ფესტივალს ტრადიციულად საპატიო სტუმარი დიმიტრი გლუხოვსკი ეყოლება. ფესტივალის ფარგლებში დაგეგმილია სტუმრის ვიზიტი და საჯარო დისკუსია.

ფესტივალის განმავლობაში ტრადიციულად მოეწყობა სპეციალური კუთხე პატარა მკითხველებისთვის, რომელიც დატვირთული იქნება სხვადასხვა გასართობი, ინტელექტუალური საბავშვო ღონისძიებებით.

თბილისის წიგნის საერთაშორისო ფესტივალი საქართველოს წიგნის გამომცემელთა და გამავრცელებელთა ასოციაციის ორგანიზებით 1997 წლიდან ყოველწლიურად ტარდება.