ქამინგ აუთი, ანუ საკუთარ იდენტობაზე ღიად საუბარი, მით უმეტეს, მშობლებთან, ბევრისთვის ემოციურად რთულად გადასადგმელი ნაბიჯია. თუმცა, როცა ამ ნაბიჯის გადადგმაში ვიღაც გეხმარება, ეს ვიღაც კი, არც მეტი, არც ნაკლები, მსოფლიო ვარსკვლავია, ყველაფერი ადვილდება.

ინგლისელ მომღერალს, ჰარი სტაილსს, ლგბტქ თემისადმი საკუთარი მხარდაჭერა ღიად არაერთხელ გამოუხატავს. ამჯერად კი გადაწყვიტა, თავის ფანს მნიშვნელოვანი მომენტის შექმნაში დახმარებოდა.

თავისი ტურნეს ფარგლებში გამართულ ერთ-ერთ კონცერტზე მუსიკოსის გულშემატკივარს ხელში ბანერი ეკავა წარწერით "დედაჩემი 201-ე სექციაში ზის, დაქამინგაუთებაში დამეხმარები?". მომღერალი წარწერის წასაკითხად შეჩერდა და დახმარება გადაწყვიტა.

როცა აუდიტორიაში ფანის დედის ადგილსამყოფელს მიაგნო, სტაილსმა ხელში მიკროფონი აიღო და გულშემატკივარს თქმისკენ მოუწოდა. თუმცა, მორიდებულმა ფანმა მომღერალს სთხოვა, მის ნაცვლად თუ შეძლებდა ამის გაკეთებას. ჰარის აღარ უყოყმანია, სცენის ცენტრისკენ გაიქცა და ხმამაღლა განაცხადა: "ლისა! ის გეია!".

როცა კამერის ობიექტივი ფანის დედაზე შეჩერდა, იგი ცრემლებად იღვრებოდა და თავის შვილს ჰაეროვან კოცნებს უგზავნიდა. აუდიტორიის აპლოდისმენტების ფონზე სტაილსმა მორიდებულად თქვა:

"ამ მომენტის გაფუჭება არ მინდა, მაგრამ უმჯობესი ხომ არ იქნებოდა, ერთმანეთთან ცოტათი ახლოს მსხდარიყავით? კარგი, მოგვიანებით ნახავთ ერთმანეთს, გილოცავთ და მადლობა".

თავის მხრივ, ფანმაც მადლობა გადაუხადა მომღერალს მოგვიანებით, როცა ვიდეო სოციალურ ქსელში გამოაქვეყნა.

"ეს მომენტი სულ მემახსოვრება", — წერს ფანი, — "მადლობა, რომ ჩემთვის თავშესაფარი შექმენი. მადლობა, რომ, როგორც ფანს, შენ გვერდით გაზრდის საშუალება მომეცი. მადლობა, რომ საკუთარი თავის შეცნობაში დამეხმარე. მადლობა".