ქართული ოცნების თავმჯდომარე, ირაკლი კობახიძე აცხადებს, რომ "ვიღაც ხოშტარიას" შიმშილობა იმისთვის, რომ მესამე პრეზიდენტმა, მიხეილ სააკაშვილმა არ იშიმშილოს, მისი აზრით, "სრული ნონსესი" და "კომიკური ჟანრის გაგრძელებაა".

"ის დანაშაულები, რისთვისაც აქვს შეფარდებული მსჯავრი მიხეილ სააკაშვილს, მოხდა საზოგადოების თვალწინ. აქედან გამომდინარე, არ აქვს მას ობიექტურად არავითარი მოთხოვნის დაყანების საშუალება, საბაბიც კი. შემდეგ ვიღაცა ხოშტარია შიმშილობს იმისთვის, რომ სააკაშვილმა არ იშიმშილოს, ეს საერთოდ სრული ნონსესი და კომიკური ჟანრის გაგრძელებაა", — განაცხადა კობახიძემ იმედის ეთერში.

ელენე ხოშტარიამ შიმშილობა პარლამენტში 3 ნოემბერს დაიწყო. მისი თქმით, შიმშილობას არ შეწყვეტს მანამ, სანამ მესამე პრეზიდენტს, მიხეილ სააკაშვილს სამოქალაქო კლინიკაში არ გადაიყვანენ.

ქართული ოცნების დეპუტატმა, გურამ მაჭარაშვილმა ხოშტარიას შიმშილობაზე საუბრისას თქვა, რომ " ახლა, შეიძლება, სხვა რომელიმე ოპოზიციონერი გამოვიდეს და დაიწყოს შიმშილობა, რომ დაკმაყოფილდეს ხოშტარიას მოთხოვნა, რომ დაკმაყოფილდეს მერე პატიმარ სააკაშვილის მოთხოვნა".

ამას გამოეხმაურა მმართველი პარტიის კიდევ ერთი დეპუტატი, ნინო წილოსანი და განაცხადა, რომ თუ ხოშტარია ამით საზოგადოებასა და სახელმწიფოს აშანტაჟებს, ამას "ნამდვილად ვერ მოუწონებს".

ხოშტარია ქართული ოცნების დეპუტატებზე ამბობს, რომ თუ მიხეილ სააკაშვილის სამოქალაქო კლინიკაში გადაყვანის გადაწყვეტილებას მიიღებენ, თუ უნდათ ყოველდღე ლანძღონ. მისივე თქმით, მოსალოდნელი იყო, რომ მმართველი პარტიის დეპუტატები მის შიმშილობაზე შეურაცხმყოფელ, ცინიკურ და ზიზღის კამპანიას დაიწყებდნენ.

სააკაშვილი პირველ ოქტომბერს დააკავეს. ის ბრალს არ აღიარებს, ამიტომ საპატიმროში გადაყვანის შემდეგ შიმშილობა დაიწყო და უკვე 35-ე დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.