კულტურის მინისტრმა, თეა წულუკიანმა მოიწონა პრეზიდენტ სალომე ზურაბიშვილის მორიგი უარი ექსპრეზიდენტ, მიხეილ სააკაშვილის შეწყალებაზე. მისი თქმით, დამნაშავემ უნდა მოიხადოს სასჯელი და ამ საკითხს ზედმეტი კომენტარები არ სჭირდება.

"გასაკვირი არ იქნება, ალბათ, თუკი ვიტყვი, რომ მივესალმები ქალბატონი სალომე ზურაბიშვილის გუშინდელ განცხადებას, სადაც მან კვლავ დაადასტურა, რომ არ მოხდება მესამე პრეზიდენტის შეწყალება, ვინაიდან, მას დანაშაულები აქვს ჩადენილი. ეს დადასტურებულია შესაბამისი სასამართლო გადაწყვეტილებებით.

როგორც ნებისმიერ სხვა შემთხვევაში, დამნაშავემ უნდა მოიხადოს ის სასჯელი, რომელიც აქვს მისჯილი. შესაბამისად, მე ვფიქრობ, რომ ზედმეტი შეფასებები და კომენტარები ამ საკითხს აღარ სჭირდება და ყველა უნდა შეეგუოთ იმ ფაქტს, რომ როდესაც ჩადიხარ დანაშაულს, იქ არის უკვე კანონით გათვალისწინებული სასჯელიც", — აცხადებს წულუკიანი.

გუშინ, 3 ნოემბერს, ზურაბიშვილმა ისევ გაიმეორა, რომ სააკაშვილს არ შეიწყალებს. ამის შესახებ მან ბრიფინგზე განაცხადა, სადაც არჩევნებსა და ვაქცინაციის მნიშვნელობაზეც ისაუბრა.

ერთი თვის წინ, პირველ ოქტომბერს, სააკაშვილის დაკავების შემდეგ ზურაბიშვილი ამბობდა, რომ მის შეწყალებას არ აპირებს. პრეზიდენტი ამტკიცებდა, რომ არასდროს შეიცვლიდა აზრს და ამის მიზეზი სააკაშვილის ჩადენილი დანაშაულებები იყო.