თბილისის მერი, კახა კალაძე ოპოზიციას მიმართავს და ეუბნება, რომ "გადატრიალება, დამხობა, რევოლუცია არ გამოვა და ყოველთვის განწირული იქნებიან მარცხისთვის.

"ერთ-ერთი საუკეთესო ტრიბუნა არის პარლამენტი იმისთვის, რომ შენი მოსაზრებები დააფიქსირო, შეხვიდე პოლემიკაში, შეხვიდე დებატებში, მონაწილეობა მიიღო კანონპროექტების მიღებაში, სხვა რას ელოდებიან? გადატრიალება, დამხობა, რევოლუცია, ეს არ გამოვა. გულწრფელად მინდა მივმართო, რომ არ გამოვა, დაივიწყეთ ეს, განწირული იქნებით ყოველთვის მარცხისთვის, ყოველთვის.

ამ ქვეყანას სჭირდება სიმშვიდე, ამ ქვეყანას სჭირდება სტაბილურობა, განვითარება, აღმშენებლობა და ამ ყველაფერში თუ გაქვთ სურვილი ჩართულობის, მობრძანდით, კეთილი იყოს თქვენი მობრძანება, არ იქნება არანაირი პრობლემა", — აცხადებს ის იმედის ეთერში.

პირველ ნოემბერს ექსპრეზიდენტმა, მიხეილ სააკაშვილმა ოპოზიციას პარლამენტის დატოვებისკენ მოუწოდა. მისი თქმით, პარლამენტმა უკვე დაკარგა სახელისუფლებო პლატფორმის ფუნქცია და იქ ვერანაირ გადაწყვეტილებას ვეღარ მიიღებენ.

31 ოქტომბერს, პარლამენტთან ოპოზიციის მიერ გამართულ აქციაზე მამუკა ხაზარაძემ საპარლამენტო მანდატის დატოვების შესახებ განცხადება გააკეთა. სააკაშვილის მოწოდების შემდეგ იგივე გადაწყვეტილება ნაციონალური მოძრაობის დეპუტატებმა, ნონა მამულაშვილმა, ანა წითლიძემ და ლევან ვარშალომიძემაც მიიღეს. სადეპუტატო მანდატზე უარს ამბობს გირჩი — მეტი თავისუფლების ლიდერი, ზურაბ ჯაფარიძეც, თუმცა მან თქვა, რომ მანდატზე უარი განაცხადა შარლ მიშელის დოკუმენტის ანულირებისთანავე.