გირჩი — მეტი თავისუფლების ლიდერი, ზურაბ ჯაფარიძე საპარლამენტო მანდატს ტოვებს. ამის შესახებ On.ge-ს პარტიის პრესსამსახურში დაუდასტურეს. ჯაფარიძე ამბობს, რომ მან პარლამენტი ქართული ოცნების მიერ შარლ მიშელის შეთანხმების დოკუმენტის ანულირების მეორე დღესვე დატოვა, თუმცა, საკანონმდებლო ორგანოს, ამის შესახებ ოფიციალურად ამ დღეებში მიმართავს.

"მე პარლამენტი დავტოვე მეორე დღეს, როდესაც ქართულმა ოცნებამ გააკეთა განცხადება და 19 აპრილის შეთანხმება არის ანულირებული. უბრალოდ, მე არც კაბინეტი მაქვს, არც ხელფასი არ ამიღია ამ პარლამენტიდან არცერთი ლარი, არც თანაშემწე ამიყვანია, ერთადერთი სტატუსი მქონდა შენარჩუნებული, იმიტომ, რომ პარტიის რეგისტრაციისა და ამ აქტივობისთვის მჭირდებოდა წინასაარჩევნოდ. სხვა შემთხვევაში დამჭირდებოდა ისევ 25 000 ყალბი ხელმოწერების კეთება და მაგის გამო შევინარჩუნე, მაგრამ განცხადების დაწერას ვაპირებ ამ დღეებში, მე ისედაც არ ვარ პარლამენტის წევრი", — ამბობს ის მთავარ არხთან.

საპარლამენტო მანდატს სხვა დეპუტატებიც ტოვებენ. დღეს 1-ელ ნოემბერს ნაციონალური მოძრაობის წევრმა, ნონა მამულაშვილმა თქვა, რომ საკანონმდებლო ორგანოს აღნიშნულთან დაკავშირებით მალე მიმართავს. თავდაპირველად, ერთი დღით ადრე ოპოზიციის მიერ გამართულ აქციაზე ლელოს ლიდერმა, მამუკა ხაზარაძემაც განაცხადა რომ პარლამენტს ტოვებს.

ნაციონალური მოძრაობის სხვა პოლიტიკოსები ამბობენ, რომ მიხეილ სააკაშვილის მოწოდებას პარლამენტის დატოვებასთან დაკავშირებით იზიარებენ და გადაწყვეტილებას პარტია ერთობლივად მიიღებს.

ექსპრეზიდენტმა, მიხეილ სააკაშვილმა ოპოზიციას პარლამენტის დატოვებისკენ მოუწოდა. მისი თქმით, პარლამენტმა უკვე დაკარგა სახელისუფლებო პლატფორმის ფუნქცია და იქ ვერანაირ გადაწყვეტილებას ვეღარ მიიღებენ.

31 ოქტომბერს ოპოზიციამ რუსთაველის გამზირზე აქცია გამართა. ნაციონალური მოძრაობის თავმჯდომარემ, ნიკა მელიამ პარლამენტთან შეკრებილებს სამოქმედო გეგმა გააცნო. მელიას თქმით, უკან დახევას არ აპირებენ და აქციას გამართავენ ბათუმში, შემდეგ ქუთაისში და სხვა ქალაქებში, ბოლოს 6 ნოემბერს აქცია თბილისში გაიმართება.

გაიგე მეტი: