პარტია დროას დამფუძნებლის, ელენე ხოშტარიას განცხადებით, ყველასი ესმის, ვინც სთხოვს, რომ არ იშიმშილოს, თუმცა სიტყვის გადათქმას არ აპირებს.

"ყველასი მესმის, ვინც მთხოვს რომ არ ვიშიმშილო, ოღონდ წინასწარ გეუბნებით გამორიცხულია სიტყვის გადათქმა. დიდი მადლობა თბილი სიტყვებისთვის. ყველაფერი კარგად იქნება", — წერს ის ფეისბუქგვერდზე.

მისივე თქმით, წუხს, რომ შიმშილობის გადაწყვეტილების მიღება მოუწია, რადგან იცის, თუ რა ცუდ ფონს ქმნის ეს ყველაფერი.

"ძალიან ვწუხვარ, რომ შიმშილობის გადაწყვეტილების მიღება მომიწია, ვიცი რამდენი ადამიანი შევაწუხე ამითი და ვიცი, ზოგადად, რა ცუდ ფონს ქმნის ეს ყველაფერი. ბევრი ვიფიქრე, ემოციურად არ მიმიღია ეს გადაწყვეტილება, ავწონე რისკები, რაც ქვეყანას უდგას და ავწონე ბრძოლის გზები.

მართლა არ მინდა, თუნდაც ოცნებამ კედელთან მიმწყვდევის გადაწყვეტილებად მიიღოს ეს. მკიდია მაგათთან შეჯიბრი ამ მომენტში. ეგებ დააკლიკოს და მიხვდნენ, რომ სიცოცხლესთან თამაში ძალიან საშიშია ყველასთვის. მათ კარგად იციან, რომ არ ვხუმრობ, სუსმა მაინც ხო იცის", — აცხადებს ხოშტარია.

პარტია დროას დამფუძნებელმა, ელენე ხოშტარიამ პარლამენტში შიმშილობა დაიწყო. მისი თქმით, შიმშილობას არ შეწყვეტს მანამ, სანამ მესამე პრეზიდენტს, მიხეილ სააკაშვილს სამოქალაქო კლინიკაში არ გადაიყვანენ.