ჟურნალისტი, მაია ასათიანი ექსპრეზიდენტის, მიხეილ სააკაშვილის გათავისუფლებას ითხოვს. აღნიშნული განცხადება მან რუსთავში სააკაშვილის მხარდამჭერ აქციაზე გააკეთა.

"იმას რასაც ახლა ვიტყვი, ვერასდროს წარმოვიდგენდი, რომ ვიტყოდი. ერთ-ერთი საქმე არის 7 ნოემბრის საქმე.

მე და ბევრი ჩემი კოლეგა ვართ 7 ნოემბრის დაზარალებულები და ნუთუ, არავის აქამდე არ გაუჩნდა კითხვა, რომ ჩვენ 7 ნოემბრის დაზარალებულები ვითხოვთ და ჩვენ ბევრნი ვართ, მე სახელებს და გვარებს არ ჩამოვთვლი, იმიტომ, რომ ყველა ეს ადამიანი ახლა ოპოზიციურ მედიაში მუშაობს, უმეტესობა მათგანი და ყველა ეს ადამიანი ითხოვს საქართველოს მესამე პრეზიდენტის თავისუფლებას.

ნუთუ, ეს არაფერს არ ნიშნავს? დიახ, მე 7 ნოემბრის დაზარალებული, მაია ასათიანი ვითხოვ მის გათავისუფლებას", — თქვა მან.

მიხეილ სააკაშვილი პენიტენციურ დაწესებულებაში უკვე 34 დღეა შიმშილობს. მან შიმშილობა დაკავების დღიდან გამოაცხადა. მას შემდეგ, რაც ექსპრეზიდენტმა შიმშილობა დაიწყო, ექიმები აღნიშნავენ, რომ მისი ჯანმრთელობის მდგომარეობა სუსტია. მხარდამჭერები და თანაგუნდელები სააკაშვილს შიმშილობის შეწყვეტისკენ მოუწოდებენ.

28 ოქტომბერს სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

პოლიტიკური პარტიები, ორგანიზაციები, სამედიცინო მუშაკები ხელისუფლებას ექსპრეზიდენტის სამოქალაქო კლინიკაში გადაყვანისკენ მოუწოდებენ. თუმცა ქართული ოცნება ამაზე უარს ამბობს. ხელისუფლების განცხადებით, პენიტენციურ დაწესებულებაში შექმნილია ყველა პირობა იმისთვის, რომ პატიმარს უმკურნალონ. იუსტიციის მინისტრის, რატი ბრეგაძის თქმით, საჭიროების შემთხვევაში სააკაშვილს სწორედ ციხის სამედიცინო განყოფილებაში გადაიყვანენ. ამის წინააღმდეგია ექსპრეზიდენტი და ამბობს, რომ როგორიც არ უნდა იყოს მისი ჯანმრთელობის მდგომარეობა, უარს აცხადებს ციხის საავადმყოფოში გადაყვანაზე.