საპარლამენტო ფრაქცია ლელო — პარტნიორობა საქართველოსთვის წევრმა, სალომე სამადაშვილმა განაცხადა, რომ ფრაქცია აღარ მიიღებს პლენარულ სხდომებში მონაწილეობას მანამ, სანამ ექსპრეზიდენტ მიხეილ სააკაშვილის ჯანმრთელობის მდგომარეობა დაცული არ იქნება. მისივე თქმით, ეს არის პოლიტიკური ბოიკოტის შესახებ განაცხადი, რომელიც როგორც ხელისუფლებამ, ასევე საერთაშორისო პარტნიორებმა ქვეყნაში არსებული სერიოზული კრიზისის შესახებ გაფრთხილებად უნდა მიიღონ.

"ჩვენ ვიყენებთ ჩვენთვის მონიჭებულ უფლებას, საქართველოს კონსტიტუციით და საქართველოს პარლამენტის რეგლამენტით და ვაცხადებთ, რომ არ მივიღებთ მონაწილეობას პარლამენტის პლენარული სხდომების მუშაობაში, სანამ სახელმწიფო და ხელისუფლება არ უზრუნველყოფს მიხეილს სააკაშვილის ჯანმრთელობის ადეკვატურ დაცვას და არ გაანეიტრალებს ყველა საფრთხეს, რომელიც შეიძლება უკავშირდებოდეს მის სიცოცხლეს. ფრაქციამ ამის შესახებ დღეს პარლამენტს ოფიციალურად მიმართა და მსურს, რომ ხელისუფლებამ, ისევე როგორ ჩვენმა საერთაშორისო პარტნიორებმა, მიიღონ ჩვენი პოლიტიკური ბოიკოტის შესახებ განაცხადი, როგორც ძალიან სერიოზული გაფრთხილება იმასთან დაკავშირებით, რომ ქვეყანა შედის უმძიმეს კრიზისში და მოითხოვს შესაბამის რეაგირებას, როგორც ხელისუფლების, ასევე ჩვენი საერთაოშორისო პარტნიორების მხირდან", — განაცხადა მან.

ექსპრეზიდენტმა, მიხეილ სააკაშვილმა ოპოზიციას პარლამენტის დატოვებისკენ მოუწოდა. მისი თქმით, პარლამენტმა უკვე დაკარგა სახელისუფლებო პლატფორმის ფუნქცია და იქ ვერანაირ გადაწყვეტილებას ვეღარ მიიღებენ.

ამის შემდეგ, რამდენიმე დეპუტატმა პარლამენტიდან გასვლის გადაწყვეტილება მიიღო. მათ შორის, ნაციონალური მოძრაობის წევრებმა, ნონა მამულაშვილმა და ანა წითლიძემ. პარლამენტს დატოვებს ლევან ვარშალომიძეც. სადეპუტატო მანდატზე უარს ამბობს გირჩი — მეტი თავისუფლების ლიდერი, ზურაბ ჯაფარიძეც. მანამდე, 31 ოქტომბერს გამართულ აქციაზე ლელოს ლიდერმა, მამუკა ხაზარაძემ მიიღო მანდატის დატოვების გადაწყვეტილება.

მიხეილ სააკაშვილი პირველ ოქტომბერს დააკავეს, ის დაკავების დღიდან, უკვე 33-ე დღეა შიმშილობს.