უკრაინის რადას დეპუტატი ლიზა იასკო ამბობს, რომ ექსპრეზიდენტი მიხეილ სააკაშვილი ამ ეტაპზე შიმშილობის შეწყვეტას არ აპირებს. მისივე თქმით, სააკაშვილმა 20 კილოგრამზე მეტი დაიკლო. იასკო რუსთავის პენიტენციურ დაწესებულებაში ექსპრეზიდენტს შეხვდა, რომლის შემდეგ მედიასთან კომენტარი გააკეთა.

"მისი მდგომარეობა უარესდება და ამის ასე დატოვება არ შეიძლება. მას ხარისხიანი სამედიცინო მკურნალობა სჭირდება და შეთავაზებული კლინიკა არის შეუსაბამო. ამ ეტაპისთვის არ აპირებს შიმშილობის შეწყვეტას, 20 კილოგრამზე მეტი დაიკლო, აქვს ძალიან მძიმე სიმპტომები", — თქვა იასკომ.

მიხეილ სააკაშვილი პენიტენციურ დაწესებულებაში უკვე 1 თვეა შიმშილობს. მან შიმშილობა დაკავების დღიდან გამოაცხადა.

29 ოქტომბერს ექსპრეზიდენტმა თქვა, რომ ის უარს ამბობს ექიმთა კონსილიუმთან თანამშრომლობაზე. მისი თქმით, ის აღარ ჩააბარებს ანალიზებსა და არ მიიღებს შიმშილობის შემამსუბუქებელ მკურნალობას.

მანამდე, 28 ოქტომბერს სააკაშვილის შიმშილობაზე საუბრისას პრემიერმინისტრმა ირაკლი ღარიბაშვილმა თქვა, რომ ადამიანებს თვითმკვლელობის უფლება აქვთ და სახელმწიფო ამაზე ვერ აიღებს პასუხისმგებლობას.

ექსპრეზიდენტის სამოქალაქო კლინიკაში გადაყვანის შესახებ ხელისუფლებას მოუწოდებენ პოლიტიკური პარტიები, ორგანიზაციები, სამედიცინო მუშაკები.