ჩრდილოეთ მაკედონიის პრემიერმინისტრმა, ზორან ზაევმა თანამდებობა მას შემდეგ დატოვა, რაც 31 ოქტომბერს ჩატარებულ არჩევნების მეორე ტურში დედაქალაქ სკოპიეში მმართველი პარტიის მერობის კანდიდატი და მოქმედი მერი პეტრე შილეგოვი დამარცხდა.

პრემიერმინისტრის თქმით, ის თავად იღებს პასუხისმგებლობას განვითარებულ მოვლენებზე და ტოვებს როგორც პრემიერმინისტრის, ასევე პარტიის პერეზიდენტის თანამდებობას.

"მე მოვიტანე თავისუფლება და დემოკრატია, დემოკრატია კი პასუხისმგებლობის აღებას ნიშნავს", — განაცხადა მან.

არჩევნების მეორე ტური 44 მუნიციპალიტეტში ჩატარდა. ოპოზიციურმა პარტიამ რამდენიმე დიდ ქალაქში და მათ შორის დედაქალაქში გაიმარჯვა. პარტიის ლიდერმა განაცხადა, რომ უკეთესი იქნებოდა მთავრობა ვადამდელ საპარლამენტო არჩევნებზე წასულიყო. ამის პასუხად ზაევმა თქვა, რომ ვადამდელი არჩევნების საჭიროება არ არის, რადგან კანონის თანახმად, კოალიციას შეეძლო პრემიერმინისტრობის სხვა კანდიდატზე შეთანხმება და ახალი კენჭისყრის გარეშე მთავრობის ჩამოყალიბება.

ზაევის მმართველი კოალიცია მხარს უჭერდა ლიბერალურ-დემოკრატიულ პრინციპებს, ასევე ევროკავშირსა და ნატოში ინტეგრაციას. 2020 წლის მარტში კი ჩრდილოეთ მაკედონია ნატოს წევრი გახდა.