შინაგან საქმეთა სამინისტროს განცხადებით, არჩევნების მეორე ტურის მიმდინარეობისას ჩადენილ სავარაუდო დანაშაულის შემთხვევებზე გამოძიება დაიწყეს. შსს ჯერჯერობით სავარაუდო დანაშაულის 8 საქმეს იძიებს, ამ დროისთვის დაკავებულია ერთი ადამიანი.

"საარჩევნო ოლქიდან 100 მეტრის მანძილზე ადამიანთა შეკრების ან ამომრჩეველთა აღრიცხვისა და 25 მეტრის მანძილზე სააგიტაციო მასალის განთავსების ფაქტებზე, ამ ეტაპისთვის, შსს-მ რეაგირება 18 შემთხვევაზე მოახდინა. დარღვევებზე პოლიციამ შესაბამისი ოქმები შეადგინა, შეკრებილ მოქალაქეებს კი გაფრთხილება მისცა", — აცხადებს შსს.

გამოძიება დაწყებულია ქარელში TV მონიტორინგის ჟურნალისტზე თავდასხმის ფაქტზეც. ასევე, შსს-ს ინფორმაციით, ვაზისუბანში, ერთ-ერთი ბოლო ინციდენტის ადგილას პოლიცია კვლავაც რჩება. უწყების თქმით, ზემოაღნიშნულ შემთხვევებზე სამართალდამრღვევები არიან როგორც მმართველი, ასევე, ოპოზიციური პარტიების წარმომადგენლები.

დღის განმავლობაში არასამთავრობო ორგანიზაციებმა და ოპოზიციის წარმომადგენლებმა საარჩევნო უბნებთან დარღვევის ფაქტებზე არაერთხელ ისაუბრეს. შინაგან საქმეთა სამინისტრო აცხადებს, რომ საგამოძიებო მოქმედებები გრძელდება და შედეგების შესახებ საზოგადოებას განახლებულ ინფორმაციას მიაწოდებენ.

30 ოქტომბერს საქართველოში თვითმმართველობის არჩევნების მეორე ტური გაიმართა. უკვე გამოქვეყნდა ეგზიტპოლის ორი განსხვავებული შედეგი. მთავარი არხის ეგზიტპოლით, ოპოზიცია მეორე ტურში ყველა დიდ ქალაქში იგებს. ამ კვლევის მიხედვით თბილისში ნიკა მელიამ 51% მიიღო, ქართული ოცნების კანდიდატმა, კახა კალაძემ კი — 49%. რაც შეეხება ტელეკომპანია იმედის დაკვეთით ჩატარებულ ეგზიტპოლის შედეგების, ამ კვლევის მიხედვით 4 დიდ ქალაქში მმართველი გუნდის კანდიდატები იგებენ. იმედის ეგზიტპოლით თბილისში კახა კალაძემ აიღო 57,2%, ხოლო ნიკა მელიამ — 42,8%. ნახეთ არჩევნების მეორე ტურის წინასწარი შედეგები აქ.

გაიგეთ მეტი: