ნაციონალური მოძრაობის პრესსამსახურის წარმომადგენელს, ნენე დალაქიშვილს ფიზიკური და სიტყვიერი შეურაცხყოფა მიაყენეს. როგორც დალაქიშვილი On.ge-სთან ამბობს, ზუგდიდის 26-ე საარჩევნო უბანზე ენმ-ის დამკვირვებელმა მას ე.წ კარუსელის შესახებ შეატყობინა, ადგილზე მისვლის შემდეგ კი ე.წ ძველი ბიჭები ჯერ საარჩევნო უბანზე დაუპირისპირდნენ, შემდეგ კი გარეთ ერთმა მათგანმა ხელი დაარტყა.

"იქ აპირებდნენ კარუსელის დატრიალებას და ჩვენმა წარმომადგენელმა არ მისცა ამის საშუალება, ჩვენ გაგვაგებინა და მივედით, იქ ჩვენ დაგვიხვდა უბანთან 100 მეტრის რადიუსში ვიღაცა ძველი ბიჭები. ასევე, უბანში იყვნენ ოცნების წარმომადგენლებად ეს ე.წ ძველი ბიჭები, ორნი, რომელთაგან ერთ-ერთი საქმეს ურჩევდა აგრესიულად ჩვენს დამკვირვებელს, რომელმაც ჩაგვაყენა საქმის კურსში ამ კარუსელის თაობაზე. დავიწყე ამის გადაღება, გამოვესარჩლე ჩვენს დამკვირვებელს და მერე აირია სიტუაცია, გარეთ გამოვედით ყველანი და ნუ, გამწარდა რომ ვუღებდი, შიგნითაც გამოიწია ჩემკენ და გარეთ უკვე დამარტყა", — აცხადებს ის.

როგორც დალაქიშვილი ამბობს, მას ადგილზე მყოფი პოლიციელისთვის ფაქტის ამსახველი ვიდეო-მასალის მიწოდება უნდოდა, თუმცა, სამართალდამცავებმა განყოფილებაში გადაყვანა შესთავაზეს. დალაქიშვილის განმარტებით, ამის მიზანი ის იყო, რომ სხვა უბნებზე გადაადგილების საშუალება აღარ მისცემოდა.

"პოლიცია იქ იყო და მე მივუთითე იმ პირზე, რომელმაც გააპარა მოძალადე, რომელიც იყო უბანზე შიგნით. კომისიის თავმჯდომარემ ჟურნალისტები შიგნით აღარ შეგვიშვა. პოლიციას მე ვუთხარი, რომ შემეძლო მეჩვენებინა, გადაღებული მაქვს როგორ დამარტყა, პუბლიკას აქვს კიდევ გადაღებული, მინდოდა ეს კადრები მეჩვენებინა, მაგრამ, ნუ, არ ნახეს", — აღნიშნა მან.

იმის გასარკვევად დაიწყო თუ არა მომხდარზე გამოძიება, On.ge შინაგან საქმეთა სამინისტროს დაუკავშირდა, პასუხს მიღებისთანავე შემოგთავაზებთ.

ეს არ არის პირველი შემთხვევა, როდესაც საარჩევნო უბანთან ჟურნალისტების მიმართ აგრესიულობით გამოიჩევიან. მათ შორის, თავს დაესხნენ On.ge-ს ჟურნალისტს და ფიზიკური და სიტყვიერი შეურაცხყოფა მიაყენეს.

დღეს, 30 ოქტომბერს ადგილობრივი თვითმმართველობის არჩევნების მეორე ტური იმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში ირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.